1.
Quing duian ning panalala ning milabas a panaun,
Atin datang a penandit quening diua maglimaiun.
Sasaquil cung anggang binit balicdan pa itang napun
Ing amlat ning pamalasinta ning taguimpan a miburul
Ing lugud ming pibucnulan durungdungan ning Meniaclung
Binalut na quing pabanglu at mayumung atin lasun.
2.
Capilan pa catula ming quing ligaya mipanusig ,
Maligayang micacaul quing lugud a mitmung lambis.
Antiwaring waterliling gato-gatong matajimic ,
Quing agus nang malumeme at sagacgac na ning batis.
Quing balang tiup na ning amiam bubulung na at sisitsit
Ing uagas ming pamalsintang alang para at catulid.
3.
Balang oras at penandit canacu iang panagurian …..
Mamucud iang mal cung dili iang perlas na ning taguimpan.
Sablang bague cule rosas careng cacung panimanman,
Ing pag-salbat ampong lumbe eque balu cabaldugan…
Timaua ia ing pamisip alang dit mang gugunaman ,
Magpaldas ing cacung iatu icang cacung maging subiang.
4.
Melabug iang banuang matas meralumdum ing masala…
Ginalgal ia ing sicluban quing paldas cung meguing calma .
Ing talic ning caiang caul at iumu ning caiang uma..
Balacusa ia ing sala ,…ianang salang e matatda….
Sala uaring penilas mu quing dalumdum ning paliasa..
Quinablas ing paniambitan quing pasbul ning Mayupaya !
5.
Nanu pa ing maguing bucas nung ala neng liguran cu ..
Nanu pa ing cabaldugan na ning mabie queting iatu ?
Nucarin que pagdulapan , nucarin ia maguing atiuo …
Ing ligaia ampong tulang peninap cung maguing cacu.
Iamung bucud meguing baquit ,cucutug pa ing pusu cu ,
Mepuput ia pangisanaua ing calladuang dilucan mu.
6.
Tatacut nang suglap cu pa careng cuta ding bulaclac…
Tatacut nang maglambang pang manintun cung baiung pugad.
Uling ining cacung pusu quing sugat nang e cacaiap…..
Magnacnac ia at daraiang pialungan na ning pagsalbat.
Sisiguc iang manigapu manangis iang alang bulad ,
Ining pusung me-ulila , quing siual nang meguing palad.
7.
Tatacut nang talbug cu pang magbisaug careng batis
Ban macquialung careng nimpa’s quing tula dang mitmung lambis.
Mecad pota abalu ra ining bie cung managuitis ,
Isunu de quing sagacgac ining pusung magcasaquit.
Nucarin que liliuan pa …Dios co , cacu ipatilip……
Ing lugud a tune lugud queti babo na ning sulip.
8.
Sinintang me ing pusu cu quing lugud mung alang dangal ,
Pangadian cu aldo’t- bengi busal naman ning caniglan .
Pacamal cung madalise , inauad mu , binie cu ngan….
Kimbilan da ding labi mu ing dauac ning catacsilan ,
Dios co sana pa-tulan me , ining pusu cung magsalbat ,
Ban e aquit tatangis pa……..ining pusung menga-gabac !!!!!!!!
.DIUANG MALIAP NING CANDABA
BIENVENIDO C. YABUT .
CALIFORNIA .NOV.27 2021.
3PM PACIFIC TIME.