==========
Anti lamong batung mabie ding kawal na ning amanu..
magbantiting gugulisak king lugud dang e magkanu.
libutad na ning akbungan at king kuta ding gereru ,
alang canlap alang takut , ketang mamius a peligru .
at libutad na ning parang mamapi la’t maglipatu ,
sasabeung la ding balas a manientang king amanu.
at dacal lang tinalacad linibutad a maginu ,
ban ing menan a salita ikabus de ketang disgu ..
========
Ding gererung kapampangan king lungsud na ning probinsya ,
mibait lang memaglatuat , balang dane manakit ka….
nung ware sa kareng sapa , kailugan , aliwa pa…
memundaking , memundalag detang bining miglato na.
memanlabung la ding grupu detang tapuk mialiwa la ,
king pigampang maging tungkul linto la pang kanya – kanya.
ing dalan a sacdal linis ginubat da ding minuna ,
meging gatid yang masuksuk , meging kuta ding kangatba !
======
Nanu kayang maging bukas ning Indu tang kapampangan ,
nung sariling banding bunga ila mismung laban – laban ?
macananung ing amanu milukluk ya king pedestal
macananung ,miduyan ya king biga ning panagimpan..
macananung mitaluktuc king tori na ning katasan
nung ding kayang banding sapni alang tugut mibatakan !
macalunus na pang dili maslag tamung tatangalan ….
gagawan dong maging dapat , detang bungang manibalang…
=======
Darasug ya ing cabiasnan lalabung yang teknoloyia….
taladalit king amanu tatakbang lang payatras pa ….
nung gawa lang cawatasan pagmasusian urian ta la ,
magkulang la ketang sukad maging sunis ampong rima.
ing malino kasangkanan nung tanggapan da mu sana….
ding aliwang talaturu magmasabal alinala…
salwak- sabing cawatasan lalantang da king lamesa….
manginlag lang manataru pupuryan pa ing mali ra.
=========
Macananu lang mabiasa king bale ning pamagaral
nung ding budning talataid ilang lalto tatawiran…
ding aliwang talasulat king gradas ning cawatasan..
pisamug da ing amanu inglis ampong kapampangan..
macalunus na pa niti ding amanung pisabungan
magadtu ya itang Inglis , Kapampangan malpa ne man.
macananu yang misadsad bangka tamu ketang pampang
nung sumangat , manimulin malasing pa king tapayan ..
=======
Macananu lang mabiasang mamikudta at gumale
detang anggang bayung sibul nung ala lang mamantabe ?
makananu dang atulid itang maling pamanapse …
nung ala lang talaturu ketang ustung pamang- gege.,,,
pamanggale kawatasan anti ka mong tatalete…
manimbang ka kaili’t – wanan , mimingat kang mamalebe,,,,
manginlag kang mipaltiku , e misakab ban surere ….
ketang ditak a kamalian lunto na kang SUNDA- SUPE..!
=======
DIWANG MALIAP NING CANDABA
OCTOBER 4,2020 ,,,,,,,2PM PACIFIC TIME
CALIFORNIA ……..
CANDABA….
VIENCY…..