Sinulat a obra ning DIWANG MALIAP NING KANDABA ( VIENCY )
PALOS VERDES , CALIFORNIA..
NOV.8 , 2020..
====
Ing labuad tang pagsalayan nanu kaya ing bukas na ,
nung bandi na ampong leguan linipas na ing aske na.
makananung detang batwin at ing bulan king sala ra ….
mikwintas lang mibalibad king batal na ning dalaga.
makananung detang nimpas ketang batis magtumayla …
ing tula ra at sagakgak , tatabling king paningaya….
=======
Makananu yang maramdam ing malambis a kundiman..
nung king labuad alang poetang king kudyapi manigtigan..
makananung ing leguan na apaslag na king sikluban..
nung mebaug la ding amanu king baul na ning sinupan,
makananu yang mituklu Mariposa king tanaman……….
ban isitsit mabanayad ing wagas nang pilubluban .
=========
At nung keti king sikluban alang poetang daralit ,
makananu ing pandurut ning yatu ban mipatilip.
king uli da ding poeta itang banwa ampong sulip ,,,
detang bunduk ampong dagat kaparangan maging gatid..
pikaul na la king tula , ding marayu at malapit …
malalaso dang tagimpan ban sagiwang mamutiktik.
=======
Mapalad ya iting yatu mibait la ding poeta ,
babye sala king dalumdum lalam ning matas a banwa.
titiman la ding bulaklak king malamyus a sonata ,
dinilu na nitang ambun ing mebakung a leguan da .
ketang mulang kebaitan ku , karin dane ning KANDABA…
ding poeta ilang sulu king dulum ning pagdugan da .
========
Sasabyan kung matning- matni , king malualas a lelangan ,
ing probinsya ning PAMPANGA, ing sale ning sablang leguan.
uling keni miapsa la ding malugud at matenakan…
ding mangalagung dalagang , batwin na ning kapitangan..
ilang babye gintung nota king matimyas a kundiman…..
ilang diwang lante gintu , ning watas ding KAPAMPANGAN !!!!
========
VIEN C YABUT .