ITULID LA DING PALIPIT

MALUGUD A PASINTABI ………….
Mayap a oras kareng sablang kayagum at kayabe kareng miyali-aliwang AGUMAN king labuad Kapampangan at manyad kung pasintabi kareng anggang aguman na misabit ya ining linubid nang poema ning Diwang Maliap Ning Candaba , nung sacaling ing diwa na atin yang ditak a maparas ibug ku ing lalu kayung magkaganang mangan king yapag ku kekayu kabalen ..ING KANAKUNG CUDTA PEMANSAGAN KENG…………………..

………………………………… ITULID LA DING PALIPIT ……………………………

1.
Malambat nang tutung bina quening cacung pamibule ,
Meyaliguat ing pamisip kening kutang king sarili.
Ngacu cabud quening busal ning diwa kung malumeme,
Sinasa la ding agumang mengalsut at mengulate.
Balang metung magbantiti ,magbansag lang mamantabe ,
Ban canita ing amanu e gumapang at gulape.

2.
Madalise ing taguimpan sagipan deng matibubus ,
Ing amanung macadase king lagnat na matitipus.
Nung ware sa king alipan kalagan da itang gapus ,
Ban mibulus at sulapo king limputan magparagus.
Dapot sablang maliliare , mabitasang matalustus,
Mipapagkal ing cabiasnan lalung lalto macalunus.

3.
Ing Parnasung Kapampangan sambitlan keng alimbaua ,
Dacal na lang bayung Pweta ding magdalit at cucudta .
Ding mabining Poetisa linual na la king taldawa…
King mayumung pangundiman malalaso pati biga.
King dalig ning pamagaral misabit la detang bisa ,
Matakal la at matimbang nung magadtu pa ing diwa.

4.
Ing bale ning pamagaral caladdua na ampong pusu…
Nung aku ing munye sanac agpang kening kakung balu.
Guyabnan ne ning cabiasnan nung nukarin mibububu,
Ing cabiasnang tatanam da ding mayap a talaturu .
Talaturu ding amanu nung dimpulan kule gintu ,
Makananung apalulut ding sagiwa at magadtu ?

5.
Kareng bayung taladalit dacal na lang masalpitik,
Dapot dakal mamalangkad ala namang talatulid.
At ding aliwang Lauriado micuculdas pa king gulis ,
E la timbang ding talatag , mipapate la pang sunis.
Detang tune magmasabal king bale tang papaigit,
Itamak la detang mali, itulid la ding palipit..

6.
Ala sanang manggaligit ala sanang mikakamas ,
King pilantik ning diwa ku nung atin mang abalasbas.
Sablang pita’t kapagnasan , iyagkas ku’t ipamulat
Magsalita ketang tutu , pibatan ya itang kaplas.
Kapilan la pa mitulid detang mali at e ganap…
Nung ding taung atyu bale , pipi langan alang bulad…


Dec.1,2019 TORRANCE, CA.
BCYABUT ,,,CANDABA,
1500HRS.PACIFIC TIME.

This entry was posted in Poeta Bienvenido Yabut. Bookmark the permalink.

Leave a Reply

Your email address will not be published. Required fields are marked *