Diuang Maliap ning Candaba.
Southbay Ca.90504
Bien C. Yabut.
Dec.4 2021 8pm Pacific time.
……Luid Ya Ing Bayung Bucas …..
Itang bucas a daratang cacaulan ning aligapgap,
Nanung bie ing baltangan da ding anac a bayung sapuac?
Dening cacung panimanman dururup cong panimalad ,
Balang suluc niting yatu macadanti ing alamag.
Detang paindu na ning napun bagting careng manalimbuad ,
Manangis king paginaguit taguimpan dang meging paldas…
Libutad ning capitangan ing mepiping alimbubu,
Papaid na nitang angin mipapalpal king marayu.
Maticas la ding guereru macabural la ding salu….
Dapot ketang peka-sidduan dalamat ing alimbuyu.
Cabang itang capaganasan malimpuyut caring salu ,
Ing cacambil king pagdugan , anino yang balatkayu.
Ing cagiwan at talindo careng piling meging watas ,
Pilatan ning banwa’t- sulip darabungbung ing libasbas .
Iti wagas dang tagimpan ding me-ulilang paninap ,
Ding watas a matenakang pepaitas na bayung labuad.
At busal ning pilubluban ing kredo dang pekamatas ,
Ding lanubung Kapampangan mangudyapi king alapap.
Dakal la ding meyalimbuad King tabling na nitang aclug ,
Dacal la ding sinagasa ketang agus memanalug ,
King anggya mang ding aliwa mangalo no ding tulatud,
Alibungbung na ning akdal migbangun la ding matudtud !
At king busal ning limputan ing gulisak a maniniud …..
Tinali lang kayanakan mibusngi la ding balugbug .
Metula lang sablang Igpa at Indu ring Kapampangan ,
Malambat nang makadase lalam na ning kalalaman .
Alimbwang ning paninap da mekibat lang kayanakan ,
Tinalbug la king taldawa , marangle ning kawatasan.
Ing aslag ning ganing- aldo magpatilip king alayan,
Magluid ya ing bayung bukas king labwad ding KAPAMPANGAN !!!..