DiwangMaliap ning Candaba.
Bienvenido C, Yabut .
California LA.90504
3pm Pacific time.
Macananung ing amanu misaca ia quing talaga ….
quing talaga ning palsimi at cutcutan ning paliasa .
Nung ding cayang talagambul at sundalus nang mamingua
misalbag lang anting sisi mipamatac a talangca ..
Dacal tana atangalan quing nanumang pamamingua ,
magluid la ding mangatapang at gererung maganaca.
Quing anngia mang pilan la mu ding bilang ding maquibaca
maticdi dang salabungan ding balas a manalasa…
Uling quetang pilubluban alang tucnang a babasuc ,
saguipan de ing amanung macatiab nang malulumud .
Dawag iaman itang dalan , matalaib at masucsuc ,
baltangan da ing dalumdum ban calagan itang gapus.!
Nung sacaling itang pita matda ia at managipus ,
itangis da quing limputan paninap dang e melulut ..
Maquiamut la pang misan quing Guinung DYOS a mengabus ,
maglibutad pasibaiu quing api ning pamipamuc..
Mamacsing la ding amanu careng supling dang melacuan,
ere sana paduagi ing amanung pacamalan.
Luguran ia ing amanu at gabun ding pipumpunan
ing tauli dang panabilin baiu ume quing cutcutan.
Miragsa lang macatiman ing lugud da e mebauas
ban ing labuad Capampangan maltar ia quing sari quatas.
At quing balang laguitic da careng ipan da papalcas ‘
ing pauas dang meguing daia quing lupa da ianang panuas.!
Ganacan iu at ibili isusi iu caring canuan ,
ding anac na ning Pampanga mataluctuc la caniuan.
Ilang tune majadlica at daia ding matenacan ,
maguinu la at masipag nung lugud la misnang lalam.
At quing leguan da ding babae , alang labis ,alang culang
meguing mutiang prinsibini at Perla na ning aslagan..
Luguran iu caiang bandi , suiuan iu ing cayang leguan
quing babo ning quecong banque dumalan lang tampalasan.
Balen ngeni damdam co sa quing mepipi dang gulisac…
ding calladuang mitambunang taimic nang alang bulad.
Acu ,ica , ampo ila , mitauid ta at magpasiag…
micaul tang micalugud quetang dulang ning paninap.
Dulang na ning panintindi at dulang na ning pigagap ,
iang credu dang matas dili ding Ibpa tang mequipalcas.
Ing aclis dang panabilin at pagdugan dang matactac…
Quing gamat ding baiung suli maganap ia ing paninap !
diuang maliap ning Candaba ..