Mekad buri yung abalu, nung nanu ya ing dapingut
adwa lang tal a amanung, binangal ku at pisamut
ing dap ibat ya king dapu, a deyu ku letra danggut
at ing ingut deyu ke B, king kataya namang bingut
Ding dapingut, ila retang, mangalati pamung dapu
kua la pamu nung wari sa, karing anak da ring asu
dimut pamu ing beluan da, keti babo na ning yatu
king miyayaliwang bage, mulala la pa at monu
Nung lawan mo ring dapingut, makayama lang akakit
kasing-dagul lang trebalak, ustung bayu la pang bait
milalu la mu king kalyap, e mu akwa mang milapit
uling kabud ikit daka, sisigpo lang pupulandit
At pablasang malati la, ditak la pamu kakanan
makagyu la king kapurit, a akakwa rang pamangan
e mengari karing dapu, e la biasang kakabsi man
agiang dakal no liklak at maybug misalbag a atyan
Ding simbitla kung dapingut, maya’pang e no daragul
manatili na la sana ,king karelang pangapungul
ban kanita e na la mu, lunto matako’t ganarul
anti karing matwang dapu, a nung nanu ngan paniamul
Neng milalu no karakal, detang mitagurian dapu
a e sasawang lilimas, king kaban ning balen tamu
uli ning katakawan da, anapnap de rugung ustu
ing bangan a datukanan, ning pondu na ning gubyernu
Vhelle Garcia
September 16, 2021
Abu Dhabi