BABAING KAPAMPANGAN

Posted on April 16, 2024 by Sergio Gramonte Calayag

nang: Poeta Sergio Gramonte Calayag

Mangalagung kapampangan lalawigan ning Pampanga
Babai lang mangarangal, malugud la keng pamilya
E mu leguan bibitbitan, pamaglutu mangabiasa
Metung la pang kabalitan keng karinan milinis la

Kasebian de reng makatua, ampon rening pilosopu
Itang pusu yang malapit, ketang atian nitang tau
Inia dening talasawa, pakaniaman ing lulutu
Uling ini yang balu na, ketang lugud a mayubu

Makanian lang kapampangan lalu na reng kababainan
Keang lugud a dalise, kening salu makalulan
Ala kaya’ng ng kapagliluan, ampon ining kataksilan
Potang iya ing lulugud, agyang batu yang aspakan

Karas ketang kagipitan, iyang akit mung talakad
Ikaluban itang palang, keng awakan ne ikabat
Tune ilang mesubuk na, keng panaun a milabas
Kareng dayuan a kasalang e siniklaud agyang ditak

Ating Kumander Liwayway iya ining mekilala
Iya ini ing libanan kalibutnan na ning gerra
Dakal la reng relihiyosa, keti labuad mekilala
Nung ila rening banggitan, e mayari ing poesia

Ilang dapat pagmadagul deng babaing kapampangan
Ilang tutung kakilala keti babo ning sikluban
Kabanalan keni nang bie, iya ini ing ingatan
Karening tutuking dai, ining dangal e sisiran

Salamat kang Joy L. Cruz

Posted in Babai, PL Sergio Gramonte Calayag, Poesia, Poeta Laureado | Leave a comment

“bulbul king kukuppian”

Posted on April 16, 2024 by Tuazon Sabandal

pemamugnus na la reng uyung pistu na,
balu na nung nu la ume mamanugpa
pablasang sineriang peparikil na la
karing lub a alang kapanualan keya.
miralit yang sunis king tiup na ning angin,
at itang dugpan da balu na nukarin
uling perikil no king karinan karin
nung nu ya manikuang akasangga na pin.
kabud ing sarili ing layun pablasa
a keyang isidduan ampong isaplala
inia e na balang mibulus yang sigua
ban ing keyang kawa ayampat na mu sa’.
— sukdulang ding uyung ibugnus nong pane,
— a bulbul nang kuppia a anting palakue.

04/16/24 //09:36
kabang gigigut skyflakes

Posted in Capampangan Shakespeare, Mala-Sonetu, PL Tuazon Sabandal, Poesia, Poeta Laureado, Tau | Leave a comment

INDUNG AMANU

Posted on March 28, 2024 by Princhipe Nang Bebang

neng: Princhipe nang Bebang
January 8, 2013

Anyang ing Indung Amanu magpaldas ya at manangis,
King bayat na ning salu na maglua yang atmu kabilis.
Pakasakmal lang palad na at ding ipan mititigis,
Uling pe-inggulutan de ring anak nang alang lambis!
Ding anak nang dapat sanang king mata na manamulis,
Ila pa ring meging sangkan nitang kayang pamanangis.

Uli ning lua nang tinulu a king gabun pin pinatak,
Iya murin meging dalan ban datang ing bayung abak.
‘Ti lamo waring medilig detang mete na nang anak,
Linsut la ring Bayung Suli merakal la’ng ditak-ditak.
Anya ing Indung Amanu migsaya yang sinagakgak.
Meulu yang pasibayu itang salu nang megapak.

Ing panyibut da ring suli yang manalili king lumbe.
Ibalik de ing Pampanga king mala-gintu nang kule!
Gamit dening talentu da at gelingan dang gumale,
Magningning yang pasibayu ining amanung dalise.
King masanting dang lindayug dening amanung miyapse,
Ing mala-dyosa nang leguan anti’yng sadya magbalik ne!

Posted in Amanung Sisuan, Poesia, Poeta Princhipe Nang Bebang | Leave a comment

KAYABANGAN AT GASTUSAN

Posted on March 28, 2024 by Sergio Gramonte Calayag

nang: Poeta Sergio Gramonte Calayag

Unan mu ne ining yabang, tatauli na ing gastusan
Pablasang ing kayamanan, pilmi iyang magisan
Dapot ining kayabangan, e magisan agyang dit’man
Tune ating mitatagan, agyang nanu pa ing gawan

Nanu naman ing pagyabang? Iyang metung mu ring kutang
Ing kabiasnan at talino, king Dios lbpa menibatan
Kayamanan babo yatu, potang mate alang dalan
Kekang saken ampon bale, datang aldo malaso ngan

Kayamanan a sasabian tutung dakal klasing uri
Kayamanan a material, kekang pera at salapi
Kayamanan ing sikanan, e pabustan malumpawi
Kayamanan ing talino, bibitbitan yang parati

At pangaras keng gastusan, gastusan deng pipagalan
Potang dening gagastusan pilming ating kapuntalan
Pamangastus saluak-sabi, alang kuentang pigastusan
Potang iyang kagisanan, makalunus ing kabilian

Keng gastusan ampon yabang ugali lang kapampangan
Makalual ya ing danupan dapot lubas e na gawan
Inia potang iyang lulual, makagani ya katawan
Makapiblas masalese agyang iya ing manutang

Gastusan ne itang piblas, makayama yang lalawan
‘gyang alang pera king bulsa, tune e ra paniwalan
Pablasang makagani ya, disente yang pakalawan
Para kaku e ya yabang, ketang piblas nang dadalan

Salamat kang Haruka Nakahara II

Posted in Panugali, PL Sergio Gramonte Calayag, Poesia, Poeta Laureado | Leave a comment

Dilang Malaram

Posted on March 28, 2024 by Jerome Nayra Manansala

Ing dila na ning malaram miyayaliwa ya aske
Ating dilang mataluras, dilang mayumu’t manene
Makintab la at masala, mapamye lang pamamugue
Oneng kakatmu lang wawa—wawang makalasung tune

Saguli lang akilala dila da reng mapanatsa
Agad de pung tatantusan ing banua ampo ing Ibpa
Kabanal-banalang dila amanung mapagkumbaba
Yan ing karelang panapal king kamulangan dang gaua

Rening dilang tampalasan mengari la keng tulisan
Reng malukang makiramdam agiu da lang panakauan
Agad lang mamatakiran alang bakas kasalanan
“Ing Dyos ya nang bala keka,” yan ing agad dang sasabian

Makalunus a katutuan e de buring palabasan
Itang dila rang magaspang agad da ne pung taisan
“Ala pung taung perpektu,” makanian lang mangabiran
“E tamu magnegatibu,” ing karelang katuliran

‘Nya pin kakung kaluguran makiramdam kang mayatyat
Ing melaklak a katutuan iya sa’ng dinan mung bayat
Miadia kang mamangilag e ka sana papaydilat
Karetang dilang malaram selusarang anting bagkat

Rening dilang mangalaram, rening dilang mangabiran
Ilang dilang mangataram manyaksak king katalaruan
Anya e ke tatabili ing tabak kung pakamalan
Uling reng dilang malaram layun ku lang pamututan!

Sulat neng
Ing Matuang Ondung

Posted in Ing Matuang Ondung, Poesia, Tau | Leave a comment

DING SUNDALUS NING AMANU

Posted on March 28, 2024 by Princhipe Nang Bebang

neng: Princhipe Nang Bebang
Minunang Misulat: 10-22-2015
Meulip: 03-27-2024

Canitang aniang yng pun da ring sundalus,
Caretang sacup na mine iang minutus,
Quing metung a misiun ban re sa’ng icabus,
Yng Indung Amanung binang macalunus.

Quing mesabing misiun metung la’ taguimpan.
Micacasundu la quing metung a dalan.
Miabe-abe lang minisip paralan.
Yng metung at metung carelang lingapan.

Aniang mumuna lang ume nang lumacad,
Pane yng tagumpe da rening alagad.
Dapot misan aldo biglang mibaligtad,
Yng metung at metung eda’nata capad.

Metung caring cawal bigla nia’ng pepacbung!
Sangcan ‘ta nung baquit dacal sinibactung.
Mica-alingo ngo daca’ lang binulung,
Cucutang da ngara “ninung pepapacbung?”.

Uling alang bisang mamin quing merapat,
Mipate pate la ding cawal a tapat,
Mipapaglinis lang cania caniang gamat.
Ating quinauani, ating mipañiabuat!

Malaguat salita mig adua lang dalan,
Ating grupung minta quetang bandang wanan,
At detang aliua quetang caili noman,
Ila ila namung mipapagratratan.

Cania caniang tapuc—mica ‘tin divisiun.
Cania caniang báracs, cania caniang misiun.
“Alang paquialaman” yng meguing desisiun.
Bageng e masampat—manong a solusiun.

O suging sundalos, mi-cruz co sa’ dalan.
At panalangin cu potang milliari ian,
Ding adua iung gamat ilang pitalnanan:
E co sana rugu mipapamarilan.

Posted in Amanung Sisuan, Poesia, Poeta Princhipe Nang Bebang | Leave a comment

“KING ARAPAN NANG PILATO – JUAN 19:1-16 (miercuris santo)

Posted on March 28, 2024 by Orly M Dizon

binersu neng ORLY MANALO DIZON;
Ortagrapiyang: C-K;
Sucad: 8/8;
Siam (9) a estropa

1
Ding judyos ngarang cuculio / mibabua lang migaligit
“I barabas atiu king crus / i Jesus ya ing ipalit”,
Macanian la casapsap mua / ban cang Jesus da apakit
Libutad Ya caring presu / ya’ng aduan reting masipit.

2
I Pilato pelaco Ne / at pepabatbat i Jesus
Malagua no man memintu / ding mamarusang sundalus,
Atin tanaman masucsuc / king corona de’ti nalcus
Tsaca pinutung cang Jesus / buntuc, canuan na metandus.

3
Pasibayu i Pilato / ding judyos keang linualan
At carela inulit na / Jesus ‘la yang casalanan,
Dapot detang pamuntuc da(pari) / cuculio dang miyagnan-agnan
A i “Jesus yang ipacu” / king ban crus Ya miyangganan.

4
Inia canita’i Pilato / ngana iting mengamanu
“Icayu na’ng bala Kea” / at cuanan Ye’ting dili yu,
Dapot cacung pamagsuri / ‘la Yang casalanan cacu”
Sinala na carin judyos / a i Jesus bulus Nia mu.

5
Ding judyos e la petugut / ing batas da ya’ng inapag
A i Jesus ing mate ya / uling Kea nang babansag,
Iya itang “Anac Ning Dios” / a malino nang papasiag
Apibalac nang Pilato / at bisa ya’ting mangilag.

6
Pengutnan neng pasibayu / i Jesus nu macabalen?
Dapot Jesus e makibat / uling ‘la Yang geuang crimen,
Cang Jesus keang sinabi / ing gulu Na buring lauen
Iya cabud maca-utus / tucnangan De’t e na paten.

7
I Jesus nganang mekibat / “tutu pin ‘ting cang upayâ
A menibat ya’ti babo / gamitan king ustung gauâ,
Mas dacal ya pakibatan / itang Cacu yang masapsâ (manganyaya)”
Caring pakibat nang Jesus / Pilato e migsalitâ.

8
Buri na Ne sang pabulus / i Jesus keang cabilian
Dapot tinercu la deti / cuculio ing capasiagan,
“Nung Jesus kecang ibulus / aring Ceasar nanung sabian”?
“Keca ya’ting beliuala / kecong pamicaluguran”.

9
I Pilato king dimdam na / caren gigcas dang amanu
Jesus pelual at lucluc king / piucuman entebladu,
Ngana careta nang judyos / “oini lauen ye’ng ari yu”
Carela ne binie Jesus / ban king crus Ya magingalu.

Mar 27/24; DIZLAG Farm & Family Resort.

Posted in Dios, PL Orly M Dizon, Poesia, Poeta Laureado | Leave a comment

DIMUT

Posted on March 28, 2024 by Jose Roman Reyes Laquian

( Tula / Poema )
nang Jose Roman Reyes Laquian

Caring dimut man a bague
Matapat tamung manese
Uling carela mayugne
Ding sicanan ta’ng dalise .

Dimut man mituqui-tuqui
La ring bague mangalati ,
Qng carelang pamilimpi
Degulan bague mayari .

E sablang bague aibie na
Ning cualta a sobra-sobra ;
Ding tutung magpaligaya
Dimut lang bague bandi ta .

Casngauan man madalisdis
Dampian meng dimut a lambis
Ning pagsuyung maqui apis
Maragli ya’yting mamalis . . .

Ninu mo ing cauangis Na ,
Degulan meguing dimut Ya ,
Gloria qng banua licua’Na ,
Migpacababa , uli ta . . .

E cu taruc maslumenos
Ing cadimuta’Na ning DIOS
Qng calipunan ding santos
Caring banuang territorios . . .

Dapot meyanti yang dimut
Ing DIOS ‘nyang megui Yang bingut ;
Biria’Na ing mequisaut
Qng sala’ing taung micutcut .

Caring beluctut ding tau
‘nya tinipa Ya qng yatu
Ba neng gauan a darechu
Ing dalan dang pamibayu . . .

E ta acuang a-capara
Ing upayang Mayupaya ,
Lelanga’Na ngan ing sabla
A menibat ngan qng ala .

Upaya Ning Calalangan
Ya’ing midinan Capasiagan
Qng Curus Ning Casaquitan
Meguing dimut Yang cababan .

E ta acuang masalese
Binie Lugud nang Dalise ,
Degula’Na e malawe
Nung e dimut teng alawe .

Qng Queang Bie a miyampang
At binie capatawaran
Micabus ya ing quetauan
Queang dimut ta’ng Miglalang .

Posted in Dios, PL Jose Roman Reyes Laquian, Poesia, Poeta Laureado | Leave a comment

ING TAPAT A KALUGURAN

Posted on March 28, 2024 by Sergio Gramonte Calayag

nang: Poeta Sergio Gramonte Calayag

Deng aduang mikaluguran maglakad la keng kakewan
Masaya keng pamaglakad, masayang mipagkuentuan
Keng kaba ning pamaglakad ing oso asalubungan
Ining metung yang milayi, at sinampa keng tanaman

Ining metung a melakuan manigalgal keng kabilian
Misip-misip nanung gawan, iya ini ing isipan
A-isip ne ing apu na, penabilin iyang gawan
Nung sakali atin oso, e gagalo keng kabilian

Ban kanita ining oso, iyang lungub keng isipan
Iyang metung a paludpud, o metung ya mung tanaman
Inia ini namang oso, iya ing durut-durutan
Kaibat nita iyang meko, saka iya ining likuan

Iniang malaut ne’ng oso, ing minukyat yang binaba
Pintalan ing kaluguran, kukutnan ne at neng tula
Nanu’ng sabi nitang oso, o amanu nang simbitla
Ining metung yang mekibat, banayad yang migsalita

“Sabi kaku”, ngana kaya, “aku ing lumawut keka”
Kaluguran kang e tapat, katapatan ala keka.
Makanian ya’ng Ebanghelyo ngening aldo yang mebasa
Ining Judas Iscariote, megtaksil ya keng Guinu na

Atlung pulung pirasung pilak, iya ing kalibe na
Menintun yang pamitagun, ban ing Guinu marakap ya
Tutung e ya pepatugut, king Getsemani la minta
Iyang keti manalangin, ing uman na yang dakpan da.

Ing masakit kening Judas, agyang iyang kaluguran
Pangaras keta nang pera, kaluguran paimburisan
Mengibabo itang pera, ing material yang sasamban
E lalawen ing ulaga, lugud pamikaluguran

Pansarili itang nasa, ing sariling kaligayan
Inia pati kaluguran, iya ining pigtaksilan
Iyang metung paganaka, neng mamiling kaluguran
Detang tapat ampon mayap ila rening pakamalan

Uling tutu lang malagad, keti babo ning sikluban
Tapat a kakaluguran, keng taliri abibilang
‘yang anting tune kapatad, potang iyang tuturingan
Yumung lugud ing pamalas, e manayang kabayaran.

Homilia nang Fr. Paul Ortiz ning St. Michael Parish
Pag-asa Anupul Bamban Tarlac
March 27, 2024, Miercoles Santo

Posted in PL Sergio Gramonte Calayag, Poesia, Poeta Laureado, Tau | Leave a comment

LAKWAN MU NA KU, E KA BABALIKID

Posted on March 28, 2024 by Jerome Nayra Manansala

Kalinguan mu na ku kanakung palsintan e ka babalikid
Potang ing laggiu mu kaku yang simbitlan e ka papaytakid
King kakung amanu ikang pakamalan e ka papaykabid
Gulutan mu na ku kanakung liguran lakad mung matulid

Kabang darayu ka ining kakung sálu kabud ya kúlísak
O neng kulisák na milukub king pusu a cabud malagsak
At king kalagsak na ning pusung susuyu kabud ku maturak
Ala na ngan kuenta ing bie kung kalulu miugse king burak

Ing kekatang lugud ala yang parasan king yatung mabagsik
Ali kata tumud king kekatang líban e ta na tajimik
Aggiu kung sumugud ampong makilaban pilit kung isiksik
O neng aku kabud ing ating sikanan talnan kang matigik

Itang katimauan keka ku ne babie nanu ya man pait
E ku manamdáman anggiang ikamate ing bitbit kung sákit
Keka na ngang lakuan ining pamiabe e ku na pamilit
E mu ku pantunan, turing mu kung mete, e mu na ku ákit

Maluat ku nang tinggap ing kekatang kuentu metung yang komedia
Ika ing pengarap ning pangatau ku ampo ning kaladdua
O e ke arakap durut na ning yatu ning kaku at keka
Uling ing pigagap ken ya mung amanu ning kakung poesia

Ing lugud a tune mengari yang ayup a kekang tatalnan
Nung buri meng mate king palad mung maskup layun meng sakmalan
Nung buri meng bumie ba yang e malipup paluawalas ing talan
Ba’ yang madalise ing lugud a kipkup dinang katimauan

Sulat neng:
Ing Matuang Ondung

Posted in Ing Matuang Ondung, Palsinta, Poesia | Leave a comment