Ing dila na ning malaram miyayaliwa ya aske
Ating dilang mataluras, dilang mayumu’t manene
Makintab la at masala, mapamye lang pamamugue
Oneng kakatmu lang wawa—wawang makalasung tune
Saguli lang akilala dila da reng mapanatsa
Agad de pung tatantusan ing banua ampo ing Ibpa
Kabanal-banalang dila amanung mapagkumbaba
Yan ing karelang panapal king kamulangan dang gaua
Rening dilang tampalasan mengari la keng tulisan
Reng malukang makiramdam agiu da lang panakauan
Agad lang mamatakiran alang bakas kasalanan
“Ing Dyos ya nang bala keka,” yan ing agad dang sasabian
Makalunus a katutuan e de buring palabasan
Itang dila rang magaspang agad da ne pung taisan
“Ala pung taung perpektu,” makanian lang mangabiran
“E tamu magnegatibu,” ing karelang katuliran
‘Nya pin kakung kaluguran makiramdam kang mayatyat
Ing melaklak a katutuan iya sa’ng dinan mung bayat
Miadia kang mamangilag e ka sana papaydilat
Karetang dilang malaram selusarang anting bagkat
Rening dilang mangalaram, rening dilang mangabiran
Ilang dilang mangataram manyaksak king katalaruan
Anya e ke tatabili ing tabak kung pakamalan
Uling reng dilang malaram layun ku lang pamututan!
Sulat neng
Ing Matuang Ondung