nang: Poeta Sergio Gramonte Calayag
Deng aduang mikaluguran maglakad la keng kakewan
Masaya keng pamaglakad, masayang mipagkuentuan
Keng kaba ning pamaglakad ing oso asalubungan
Ining metung yang milayi, at sinampa keng tanaman
Ining metung a melakuan manigalgal keng kabilian
Misip-misip nanung gawan, iya ini ing isipan
A-isip ne ing apu na, penabilin iyang gawan
Nung sakali atin oso, e gagalo keng kabilian
Ban kanita ining oso, iyang lungub keng isipan
Iyang metung a paludpud, o metung ya mung tanaman
Inia ini namang oso, iya ing durut-durutan
Kaibat nita iyang meko, saka iya ining likuan
Iniang malaut ne’ng oso, ing minukyat yang binaba
Pintalan ing kaluguran, kukutnan ne at neng tula
Nanu’ng sabi nitang oso, o amanu nang simbitla
Ining metung yang mekibat, banayad yang migsalita
“Sabi kaku”, ngana kaya, “aku ing lumawut keka”
Kaluguran kang e tapat, katapatan ala keka.
Makanian ya’ng Ebanghelyo ngening aldo yang mebasa
Ining Judas Iscariote, megtaksil ya keng Guinu na
Atlung pulung pirasung pilak, iya ing kalibe na
Menintun yang pamitagun, ban ing Guinu marakap ya
Tutung e ya pepatugut, king Getsemani la minta
Iyang keti manalangin, ing uman na yang dakpan da.
Ing masakit kening Judas, agyang iyang kaluguran
Pangaras keta nang pera, kaluguran paimburisan
Mengibabo itang pera, ing material yang sasamban
E lalawen ing ulaga, lugud pamikaluguran
Pansarili itang nasa, ing sariling kaligayan
Inia pati kaluguran, iya ining pigtaksilan
Iyang metung paganaka, neng mamiling kaluguran
Detang tapat ampon mayap ila rening pakamalan
Uling tutu lang malagad, keti babo ning sikluban
Tapat a kakaluguran, keng taliri abibilang
‘yang anting tune kapatad, potang iyang tuturingan
Yumung lugud ing pamalas, e manayang kabayaran.
Homilia nang Fr. Paul Ortiz ning St. Michael Parish
Pag-asa Anupul Bamban Tarlac
March 27, 2024, Miercoles Santo