Bala kumo sana liguran muku ‘Tang,
minasa ku pamong é muku pabustan,
king bingit ning kakung sakit aramdaman,
atyu ka lele ku’t apisan mu kanuan.
Maski é mu balu ing kakung saingsing,
nung atyu kamo sâ kening kakung siping,
ikit mu sâ bili é melalâ tambing,
king aplus mung lugud agad ku mong galing.
Nung dindam muku ‘Tang at ‘me mung pinsinan,
gugulisak naku é mu darandaman,
manangis naku ‘Tang ika’ing kakung awsan,
mamun naku keti é kapa dinatang.
Ngeni ala naku é na makabalik,
ketang ibatan ku nung nuku mesakit,
pengan ku ing lwa ku mengulayit pilit,
dapot ing milyari é ka man pepakit.
Nuka karin Tatang ketang oras ayta?
ketang kailangan ku ing kekang suporta ,
sana nung balu ku , é naku menaya,
inyang dimut namu ing kakung inawa.
Patria Bondoc David
( Tsokolating Lagu-lagu)
Ciudad ning Angeles
25 ning Hunyo 2019