nang: PL Sergio Gramonte Calayag
Kanaku ‘lang ilarawan deng dakal a kasangkanan
Nung ba’t ika’ng luguran ku, keti babo ning sikluban
Uling keng kanakung pusu, yumung lugud ing mitanam
Tinubu ya at mesese, ing kalinguan e ku gawan.
Kanaku mo peparandam, kasapuak ku king masala
Keng dimdam mung kasakitan, at tinulu nang kekang lua
Mapaling kawul mu’t apis, kekang labi deng mumuma
Saka ika’ng pasalamat, king Dios a mayupaya.
Iniang bingut kung mainsak, atsu ka kening siping ku
Amuk ya man o insekto, e mo buring dugpa kaku
Angga iniang meragul ku, e miwale keng lele ku
Ban kanita e mitisud, alale mu yang babie mu.
Lalam na ning kasakitan, teguyud mu kung magaral
Atad-sundu king escuela, at pibata itang pagal
Pepagaral king kolehiyo, ban mikabie kung marangal
Sakripisyo mung gagawan, tutung kaku mu pepabal.
Atandanan ku kanita, iniang aku’ng menandaman
Makilua lang kekang mata, kabang man’tun kang kasopan
Kamag-anak lalapitan, manigapu keng arapan
Anggang iniang kinayap ku, itang tula iyang dimdam .
Ing lugud mu kakung lndu, tutung kipmuan king kamalan
Regalo kang ibat king Dios, kanaku ka peparandam
Mapatad man inawa ku, keni babo ning sikluban
E ku agyung makabayad, keng lugud mu at kamalan.
Ining lugud mu kanaku, alang sukad, alang anggan
Ing pakamal mung pepabal, ini alang kapupusan
Aku, ining kekang laman, a metakmus keng katawan
Yumung lugud a dalise, kening bie ku, e kinawang.
Salamat pu kakung lndu, alang anggang pasalamat.
