nang: PL Sergio G. Calayag
Kawatasan a misulat, a bunga ning kaisipan
Patungkul la keng amanu, ing amanung kapampangan
Iyang tutung amulatan, kareng kakung pipumpunan
Aldo-aldo gagamitan, keng malukang kakarinan
Keng sarili ‘yang dinatang, aku ing manialupsupan
Deng gagale neng balasyun, ala nakung darandaman
Deng zarzuela at comedia, deng poesia at crissotan
Mewala lang anting bula, keng kulturang kapampangan
Kening malalam kung tudtud. tutung aku ing mipakde
Anting sundalus ning gerra, talakad king pangapase
Telanan ke’ng kakung pluma. ing sandata kung milele
Ginamit ke keng labanan, ban kanita mangumpe
Kabang aku ing susulat, manintun kung manantabe
Ing panyulat kung milele, mabagal ya at manene
Anting anak magpatalan, lele dingding mangulabe
Miragsa at tatalakad, e petugut megpursige
Karing kilub ning AUF, Knights of Rizal keng pulung da
Atin tau a ginale, matenakan yang poeta
At malagua keng lepitan, saka aku’ng pekilala
Poeta Romy Rodriguez, laureadu yang mekilala.
Keng burul nang Tang Naring (Maniago), karin balen ning Mexico
Akilala ke’y Frank Guinto, metung ya rin a laureado
Mibasa’t mikaluguran, ining maganakang tao
Makanian ing pami-abe, ning metung a caballero.
Salamat keng Holy Angel, at kang Sir Robby Tantingco
Kabud iyang akilala, tiwala na binie kako
Center for Kapampangan Studies, kasopan na kaku
E kalinguan kapilan man, pasalamat ing babie ko.
Pekilala neng Tatang Frank, Tatang Virgilio Calilung
Metung ya ring ginabe, kawatasan ku’ng sumulung
Midinan kung sikanan lub, potang atin pamitipun
Gagale ku at gagambul, ketang aus ning panaun.
Salamat kareng poeta, alang sawang mamantabe
Pamisulung keng kultura, panaun da iyang babie
Atsu la man ‘liwang bangsa, isipan da atsu kene
Ating pusu a malugud, ing lugud da madalise.
Maragul ku pasalamat, ‘bie king Ari ning Parnaso
Renato Bonus Alzadon, poeta yang Capaseño
Tiwala na kaku binie, ing korona ning laureado
Simbul ne ning pamaglaban, ing amanu yang paglualo.
