nang: PL Sergio Gramonte Calayag
E ka migaganaka o kanakung sinta
‘gyang maputi ka buak, lugud dalise ya
Manibat king ibat kabud akilala
Tebak ku keng batu, tune luguran ka
Malugud mung koya kakung kaluguran
Iyang kabarkada, keng secondaryang mal
E ka pa kilala, atsu ka pa grade one
Dapot ing pamilya kilalang lubusan
Karas kaduang banua mesira panlakad
Aku ing melakuan, keng kekang kapatad
Ating limang banua panaun sinikad
Linukub ya kaku lunus alang patad
Kanita a-isip kanakung isundu
Kakung pamagaral ban aku’ng masensu
Meg-working student ini yang gewa ku
Pibata ing sakit, ‘yang adalanan ku
Ika’ng akaklasi keng e ku kabaluan
Roll call ka meyawus pilidu mu’ng dimdam
Anti yang musika masayang panandam
Mata ku ginale, ikit kekang lugal
Kayari ning klasi ika ing lepitan
Aku’ng pekilala, koya mu yang kitang
Kabud akilala lugud yang milulan
Manibat kanita ika’ng pekamalan
E ta memalagua, kening pamalsinta
Miras king kolehiyo saka kinarera
Kabud meyari na saka memagobra
Ila reng sinaupan deng kakung pamilya
Labing atlung banua ining pamaglolo
Saka ta kinasal a cuatro ing Junio,
Itang migsarili, migpamilya tamu
Tutung menatili lugud a mayumu
Panaun milabas puputi na ing buak
‘gyang iti maputi lugud e kukupas
Mayupayang Guinu aku’ng pasalamat
Ika’ng asawa ku, misna king katapat.
