nang: PL Sergio Gramonte Calayag
Ing bokasyon na ning tau, pakiyarle ketang lugud, keng karinan magumpisa
Pengari deng talaturu, kilub ning pibale-bale anting metung a escuela
Ila reni deng modelu, tukian bakas dening anak alimbawang lalawan la
A dapat dang pamarisan, keni nang bieng dadalanan, nukarin la man mipunta
Itang mayumu dang lugud, kening pusu makalulan iyang tune sisinupan
Kalingapan ing mumuna sesesen ya’t gagambulan anting metung a tanaman
Kaingatan aldo-aldo, lalako dening manyira kabang ilang paragulan
Makanian ya ing pamilya, yumung lugud ing panyese, kareng pusu yang lululan
Kipmuang pali’ng paparandam, anting aping milalablab maglipato king katasan
E pabustan iyang matda, at sala na e mawala keti babo ning sikluban
Kakalabkab keang pali, tutu yang mikakaluku, kareng salu makalulan
Malasakit at masabal, iyang tutung panandaman keng malukang pagkarinan
Itang aral dang tuturu, deng malugud a pengari atsu busal ning pamilya,
Tune ini iyang pugad, yumung lugud at pakamal, makalulan keng pusu da
Inia alang kasangkanan ing pakamalang pamilya, kabanalan mayakit ya
Mitalanan la reng gamat, kagalangan ing mimiral, pairalan kening bie da
‘Nia nanu man ing akakit, dening kayang meging supling iya tutung pakiapusan
Pablasang deni nang anak ilang tune mapakiapus, pengari da ‘lang apusan
Ketang e ra kamalayan ila rening talaturu, keng pamilyang pakamalan
Mumuna ing kaingatan, keng amanung sasambitlan at pangimut dang gagawan
Nung ika ing mananaman, tune ika ing mamupul, nanu ya mang kekang tenam
Pablasang e ya mamunga, nung mangga yang kekang tenam, at mupul kang metung pakuan
Makanian rin keng pamilya, ing bokasyon yang tatanam kareni nang pakamalan
Datang ya itang aldo, pangaras ning pamamupul, kabanalan ing pupulan.
(Sukad 24)
August 11, 2023