Tianjin, China
Komusta pu kabalen,
Minta ya ing talasulat king Tianjin, China, ban maging talapagsalita keng metung a workshop. Migdatun ya karin kilub ning pabulan, migsalita keng mapilan a tema. Karin ya munaman mebiasang minum tsa uling makayabe yang inuman keng balang pamangan kareng otel a tiknangan na – almusal, pagtuan, minidal, ampong apunan.
Mumunang aldo panyatang na, seganan de reng talabubu ning workshop a gampanan na atdela re keng metung a magarbung apunan. Minorder lang dakal a pamangan a inapag keng metung a maragul a lamesang pabilug. Labing-aduang putahi, tidua o titlung pinggan balang katau keng lamesa. Maigit dobli keng agyu rang gisanan deng mamangan. Ing layun, pakit da keng pamirungutan ing kaugalian (at aria) keng Tsina a ing pamanapag pamangan keng dulang metung yang selebrasyun ning kariwasan at at kasaganan keng bie. Ing pamanggisan keng makayapag a pamangan tanda ning karanupan at kakulangan grasya king bie ning metung a tau.
Bilang masaya at mapaling salubung keng bisita, atin lang metung a gawi nung nu re pangutnan mialiwang kutang tungkul keng sarili na. Alimbawa, talasawa ya ba, pilan ya anak, nanung paburitu nang kule, nanung ilig nang libangan, at nanu pa. Ing sopas, balang kutang kailangan la ngan minum metung a shot keng karelang lokal a alak (white wine), deng anggang atiu keng dungutan. Bayu meyari ing bengi (o abak), malasing la ngan deng magselebra, pati ing talasulat. Kapnamu naman, aldo Sabadu kabukasan at aldo painawa, inya alang prublema. Pepayatad de keng otel ing talasulat a ala namang kasasagkulan miras at metudtud, kaibat nang memanyuka.
Kaibat ning paruminggu, pisyal de reng mapilan karing kayabe keng workshop ing talasulat keng peka-pamosung “Great Wall of China”.
Magsilbi yang puntan manibat keng bandang kalautang norti ning Tianjin. Agpang kareng ekspertu keng istoria ning yatu, tatayan deng mitalakad ing parting Tianjin ning pamosung pader ketang siglung 550-618. Dapot meging epektibu yang panyagka kareng kasalang keng giyera maigit pamung 700 banua kaibat nang mitalakad kapamilatan ding dakal pang dagdag a pasilidad at kagamitang panlaban.
Ing pamamasyal kapamilatan ning pamaglakad babo ning Great Wall metung yang popular a puntahan da reng turistang manibatan kareng miyaliwang suluk ning yatu, antimo keng Pilipinas.
Salamat pu keng pamamasa, at mingat ta palagi.
Angga pu keng tutuki.
Freelancer