Ketang misan, ining mata, asbuc, utac at balugbug
mipapagcuentu la reti ampon mipapamaratut
nganang matang migsalita, caring atlu nang carungut
bilang partis ning catawan, dapat atin tang pamuntuc

Ban canita masalese nganang matang mig isplica’
cagiwan ding balang metung kecatamu ipasyag ya’
king ba tamung abitasa, ninung peca-maulaga’
tunggal- tunggal kecatamu, malinawa’ne ing caya’

Anti kening cabilyan cu, ustung alang panimanman
ala cong akit bitasa, keti babo ning sicluban
e co miras caring lugal a pagnasan yung puntalan
Inia acu ining dapat, a kecayu mamuntucan

Sinalangsang ya ing utac, acu’ing dapat manimunu
uling acu ing mimisip, caring bage e yu balu
nung ala cu, mangmang cayu, inusenti ampon dungu
atyu cacu ing cabiasnan, a kecayu cu ituru

Minatba neman ing asbuc, uling e na apibata’
ing inapse rang amanu, retang adwang cayabe na’
inia nganang migsalita, parewu mung alang cuenta’
cagiwan yu, icong adwa, nung cacu yu icumpara’

Ica mata, nanu man ing bage kecang asisilip
nung e acu e mu naman, apasyag ing kecang ikit
antimurin ica utac, wa man ica ing mimisip
e mu naman apawaga, acu mu rin ing maglabit

Inia acu ining dapat, a kecayu mamuntucan
uling acu ing maniabi, king kecatang capagnasan
caring ustu ampon lisya, acung babye calinawan
acu mu ring mag isplica, ban ipasyag ing nanu man

O macananu nacu man, ing kitang na ning balugbug
kecatamung apat ngana, acu dapat ing pamuntuc
king limputan, ica mata, utac ampo ica asbuc
nung e acu, e yu balu ing sigla a cacaluscus

Acu ing kecong aligan, ban lubus yung abitasa
ing sasabyan da ring tau, a nasa rang ipawaga
ica asbuc, nung ala cu, king palage mu mo caya
nung ala cang daramdaman, mabiasa cang magsalita?

Nganang matang sinalangsang, ta nu yu la acasabi
detang maclac a balugbug, antimurin detang pipi’
pablasang acung manakit, king cumpas at sinyal deti’
caring taung anti caren, acu ing macaintindi’

Cabang aplit lang mitutua, deting apat a paragas
ketang bandang calalaman, ating gulping sinalabat
king ban e co magugulu, nung kecayung minamayap
nganang buldit, acu namu, ing kecata mamalacad

Sinagacgac la ring apat, ketang sinabi nang buldit
inumis de’t piniabyanan, king amanung mangasakit
agyang ditac ngara reti, keca e ke pairaig
capirasu ca mung busbus, a king dinat talapusit

Menamdaman ya ing buldit, caring piniabi ra caya’
inia e ne migsalita, tinicum ne’ing balungus na’
kilub na ning patingapun, uling iti migmalun ya’
e na na sicasu niti, catungcula’na king obra’

Sinaingsing ya ing atyan , iniang iti cumatmu ne
ing dinat a atipu’na , buri na na niting yugse
dapot uling ining buldit, migmalun ya at metamle
e ne bisang manigobra, migsulmuc ya ketang lele

Uling king depat nang buldit, meliswas la rening apat
maybug-aybug neng mamurit, macuculta ining utac
maduduling ne i mata, ining asbuc papalatac
at ing balugbug a matni, migumpisa neng mangaclac

Pauli na ning milalung sakit deting panamdaman
apicayari ra reting, i buldit na’ing mamuntucan
canita ra apibalac, ing e la dapat tatasan
ding isipan dang maina, a carelang mamalatian..

Vhelle V. Garcia
July 18, 2015
Abu Dhabi