Masican ing bagyu, ing uran papaspas
sisyuc, sasabeung, angin a malisuas
ding bale’t tanaman, disan dang tampalas
casulucang-suluc, mirasnang laganas.
Miglapo lang ilug, mibugnus lang dique
minagus queng dalan, limbug qng marangle
pati bulubunduc, tinagusgus lele
singil ning panaun, dacal pemayad bie.
Ing datang ning bagyu, bigla ing urada
saquildap nang layas, ya ing panyatang na
nung nanung salese, nung e migbisita
yang cagutgutan na, caibat mendisgrasya
Ding bale’t tanaman, mipayid la ticdo
tau at animal, menucyat la babo
ding alang pispatan, mimin lang ginato
ing mua na qng lulam, tinabug yang aldo.
Gulgul ing ecsena, sumami ing bista
paldas ing paligid, malumbe ing tanda
nucarin la tucnang, ding baleng memun na
pali’ng paniglon ding catawang marimla.
Metung ya’y Amung Greg, biniru ning albug
qng queyang tucnangan, sinapa yang ilug
sasalpantaya man, e lingad ing carug
bista man tetag ne, quelame ne ing lub.
Nganing mag-tricycle, “Amung George, tara pu
quetang medyu matas, magbacwit ta pamu”
dapot nganing Among, “queni na cu itu
e na cu pabustan, Dios ning Pacalulu”.
Miras ing pinandit, titas pa ing danum
manucyat nya naman, pababo y Amung
oini na ing magdyip, queya sasalusun
dapot nganing Pari, “qng Dios cu magsantung”.
Tinas pa ing danum, e tila ing uran
sinampa ne’y Amung, pasamanung awang
pina-pinandit pa, oini’ng mag-amphibian
dapot ngana, “ing Dios, e na cu paimbursan”.
Alang patnang uran, lalapo pang danum
ing abut ding mata, laganas nang bubung
ating paginaquit, pangadi nang Amung
“Dios cu, antayu pu, pengacu yung canlung”.
Saguli, dindam ne bibiyung sasandirit
oining elicopter, queya ligid-ligid
queng “mike” ning pilotu, cuculyo matimid
“Amung, tara na pu, sagmit co qng lubid”.
At ume ya’y Amung magsinyal pailacwan
panalig na qng Dios, diyan neng caligtasan
iniang cabud-abud, alang capiadyan
dagundung yang bosis, banua menibatan.
“OY, GREG, UTANG A LUB, TUQUI NA CA CANYAN
OT NANU PA DUGU ING QUECANG PANAYAN?
PEPADALA CUNG DYIP, TRICYCLE, AMPIBIAN
BURI MU PA ATA, QUECA CU PANG TIPAN”!
01/10/2009
pugue ne pu ning malucang,
Anac Ning Arenas