Neng Babaing Matun 1/7/14
E mu karing plasdan, sapa, at taldawa
Mayakwa’t mayakit lalkas a talangka
Agyang keng mamala, lalto la’t sasapa
Mayling mangalawat, palbug ding aliwa.
Itang amanuan ku adwa ya galame
Dapot neng kabyasnan kalawat talete
Keka neng kasiping dapot emu male
Ikang papalbug nang bibili king lele.
Neng ayabit na ka menabu na lalam
Magkunyari ya pang kekang kaluguran
Ban e mu abistu ing kayang gagawan
Ing sablang masanting keka na sasabyan.
Kautak talangka ing aus karela
Maburing mibabo karing kayabe ra
Kaybat ayli-ayling balumu buruha
E ‘tugut gagapang manintun biktima.
Deni kapatad ku, adwa la alino
A pakyabayan da kilub ning aldo-aldo
Eta pala balu, metung lang bantilo
Marinat la isip, pasalikut galo.
‘Nya mimingat kareng kautak talangka
Kanita e dasan pami-pamanganyaya
Pablasang nasa rang king matas mikana
Agyang kayabe re dalpakan deng sarya.
Ugaling talangka, dapat nang iugse
Mipagmalasakit, mipapanantabe
Ilako ing dirya, mangading miyabe
Kanita ing bie ta, ume nang salese.