Soneto 13

Lorung Malabit
Adle Shakespearean Sonnet
Silaba 10 Taladtad 14
Estropa 3 Quatrain 1 Couplet
Rima abab cdcd efef gg
*
Masala ne ing bie kung miglulam,
uling milislis na la ring bigậ.
Panaun na ban ibat king lalam,
magbabo na ku ngeni’t mibaguậ.

**
Ing aral a likuan da ring galus,
iya ing matibe kung guyabnan.
Ban managumpe na kung malaus,
ing lisya e ku na pasibayuan.

***
King dadalanan a bikualbikual,
pangilagan ku nang mitalabû.
Lagpusan ku ing balang sumbagal,
at e ku muling metung a bigû.

****
Ing maplas at mapamirung napun,
iyang talaturu ku at timun.

PL Rodel E. Gozum
27 Setiembre 2017
Munoz, Lungsud Ning Quezon