(para queca apu)
Lorung Malabit
Silaba 16 Sesura 8/8
Taladtad 4 Estropa 7
Ortografia C-Q
*
Aniang misapuac ca queti, qng iatu tamung carinan,
yng tulang linucub cacu, e cu agiung ilarawan.
Qng lupa cu memalebe, yng lua cung mitutultulan,
at yng salu cung kinarug, tinatap iang misna sican.
**
Yng benging tajimic aniang, bilbal ne ning quecang gagậ,
anting ding angel qng banua, ilang cacu migtumailậ.
Yng dalit a menibatan, caring labi mung maputlậ,
aintindian que anggiang ala, iang amanu mang bitasậ.
***
Cabud asuglapan da ca, qng pangabalut mung lampin,
migduian ia ing pusu cung, mistula rang pigtiririn.
E cu balu yng piramdam, anting gagato qng angin,
at bigla namung metindag, yng culul ning sabla carin .
****
Cabang pagumasdan da ca, qng paiapa mung panudtud,
lalapo ia yng pusu cung, queca malabis lulugud.
Miglala nacung paninap, a para queca mu cabud
a qng suluc ning diua cu, titipunan cu’t bubucud.
*****
Canita yng balang aldo, balamu atin iang culang.
E cu atuldu nung nanu, anggiang binit cung cucutang.
Dapot aniang queti iatu, linual na ca at dinatang,
atantu cung ica palang, caganapan karing bilang.
******
Manibat qng mibait ca, meging malino yng sablậ,
ataruc cu’ing cabaldugan, na ning uran at ding bigậ.
Nung baquit atin dalumdum, a liliwas qng masalậ,
pauli mu o apu co, lubus cu nang abitasậ.
*******
Mecad atin cung arapat, a maiap qng metung cung bie,
ania ring dios qng catasan, yca cacu ra ca binie.
Uling yng metung a taung, atin depat masalese,
Queca, iya mung matampang, tumaid at mangipande.
PL Rodel E. Gozum
18 Agosto 2017
Munoz, Quezon City
Categories
- () Pang-Anak
- Adle
- Amanung Sisuan
- Ambag
- Anac Ning Arenas
- Bunga
- Central Luzon Daily
- Crusada: Mangapampangan Tamu
- Gule
- Kapasiagan
- Kasangkapan
- Kataya
- Letratu
- Libru
- Makatakut
- Palsinta
- Pamilya
- Para Balen
- Parikil
- Poeta at Poetisang Kapampangan
- Poeta Albin L. Buan
- Poeta Antonio M Medina
- Poeta Apung Gusting
- Poeta Bagse Ning Kailugan
- Poeta Bienvenido Yabut
- Poeta Billy B. Beltran
- Poeta Cris A. Gonzales
- Poeta Eduardo Bagtas Garcia
- Poeta Eric Dizon
- Poeta Faustino L. Magtuloy
- Poeta Francisco Isagani Manansala
- Poeta Herman Pablo
- Poeta Irvin Harvey Rivera
- Poeta Marciano M. Mangalindan
- Poeta Rodrigo Sicat
- Poeta Ronald Malig
- Poeta Rudy P. Laxamana
- Poeta Sotn Assesen Emnener
- Poeta Tuazon Sabandal
- Poeta Vince Anthony Feir
- Poeta William Santos
- Poetisa Anj Olalia Hizon
- Poetisa Floring Ocampo-Mangune
- Poetisa Josephine Britten
- Poetisa Loida Dizon Guintu
- Poetisa Maria Sinucuan
- Poetisa Marinella Go
- Poetisa Mary Joy Maglanque Beltran
- Poetisa Melanie Cunanan Naguit
- Poetisa Mely G Catacutan
- Poetisa Patria Bondoc David
- Poetisa Rose M. Macaspac
- Poeta Laureado
- Project: Mangapampangan Tamu
- Talapanulip
- Talasulat Kapampangan
- Tanaman
- Uncategorized