Qng Pauli Mu

(para queca apu)
Lorung Malabit
Silaba 16 Sesura 8/8
Taladtad 4 Estropa 7
Ortografia C-Q
*
Aniang misapuac ca queti, qng iatu tamung carinan,
yng tulang linucub cacu, e cu agiung ilarawan.
Qng lupa cu memalebe, yng lua cung mitutultulan,
at yng salu cung kinarug, tinatap iang misna sican.
**
Yng benging tajimic aniang, bilbal ne ning quecang gagậ,
anting ding angel qng banua, ilang cacu migtumailậ.
Yng dalit a menibatan, caring labi mung maputlậ,
aintindian que anggiang ala, iang amanu mang bitasậ.
***
Cabud asuglapan da ca, qng pangabalut mung lampin,
migduian ia ing pusu cung, mistula rang pigtiririn.
E cu balu yng piramdam, anting gagato qng angin,
at bigla namung metindag, yng culul ning sabla carin .
****
Cabang pagumasdan da ca, qng paiapa mung panudtud,
lalapo ia yng pusu cung, queca malabis lulugud.
Miglala nacung paninap, a para queca mu cabud
a qng suluc ning diua cu, titipunan cu’t bubucud.
*****
Canita yng balang aldo, balamu atin iang culang.
E cu atuldu nung nanu, anggiang binit cung cucutang.
Dapot aniang queti iatu, linual na ca at dinatang,
atantu cung ica palang, caganapan karing bilang.
******
Manibat qng mibait ca, meging malino yng sablậ,
ataruc cu’ing cabaldugan, na ning uran at ding bigậ.
Nung baquit atin dalumdum, a liliwas qng masalậ,
pauli mu o apu co, lubus cu nang abitasậ.
*******
Mecad atin cung arapat, a maiap qng metung cung bie,
ania ring dios qng catasan, yca cacu ra ca binie.
Uling yng metung a taung, atin depat masalese,
Queca, iya mung matampang, tumaid at mangipande.

PL Rodel E. Gozum
18 Agosto 2017
Munoz, Quezon City

This entry was posted in PL Rodel E. Gozum, Poeta Laureado. Bookmark the permalink.

Leave a Reply

Your email address will not be published. Required fields are marked *