Makuyad a Poesya
Irvin Harvey E. Rivera
Siuala Ning Maliwalu/Anac Ning Baculud
June 12, 2019
Dakal la ring sakit magalto king tawu
Misan mayayagap, misan mayuyulu
Abalu mu na mu king danggut o sepu
Nung malala na at ala nang panulu.
Misan ating sakit a e mu piyadyan
A misan kalawat king kekang katawan
Abalu mu na mu nung seryosu na yan
Nung e ka kakayap, e ka mipapaldan.
Magumpisa yan king malati mung bukul
A e mu isipang kabud n’ya mu dagul
Abalu mu na mu aliwa ne kulul
Memuli ne palang kanser a maragul.
Ing sakit neng kayi misan alang tanda
Datang na mu kabud tambing nang malala
Abalu mu na mu kagupu mung bigla
Lulura na kamung marayuput daya.
Kalupa na mo ning malilyari ngeni
E ka makapiju at e mu asabi
Ing sakit anti yang manako neng bengi
E mu man kaburyan, pilmi mung malyari.
Inya marapat mu at kekatang daptan
Ing maningat ta’ king pamikakatawan
Ala nang muna king bage kalinisan
King pibalebale at meto-ketawan.
Kanyan apiyadyan ing datang a sakit
Malawut kalawat, malawut nang mampit
Sasabyan da man nung bina yang mapayit
Nung yan makakayap, Ba! E ta’ pagkayit.
King panaun ngeni miyayaliwang Virus
Ing daragpa keti a tiki ning dagus
Ing sakit a ketung ampo itang lupus
Miyayaliwang sakit o’t e mapupupus?
Nanu nang panulu ing keka ra binye
O’t ing kapaldanan kasakit nang mibye?
Pablasa ing sakit sasabyan dang pane,
Nung kinalawat ne pilmi na kang mate.
Miyayaliwang bage lungub na king isip
King salunan mung bie ninu ping manyagip?
Ninung mayupaya a keti king sulip,
A mie kapaldanan bang sala mitilip.
Kanyan mu ayisip manintun panulu
Potang king katawan megui nang peligru
Maski pa ing mayap a Doktor a Henyu
Ala neng balu pa keka makaulu.
Kareng albularyu kanyan ka lumapit
Sumubuk paulu king mesabing sakit
Kanyan mu abalu, kanyan mu na akit
Potang ing aldo mu bilang na mu’t mamit.
Makanyan nang lungub king kekang sarili
“A atyu king sepu ing ‘gang pamagsisi”
Ayisip mu na mu ketang bandang tawli
Potang datang na at keka na malyari.
Neng kayi pin naman ing pamikatagun
Mamye yang dalan na king marimlang aun
Abalu mu na mu nung keta king pantyun
Makakera na ka’t paynawang maratun.