Macuiad A Poesia
© Irvin Harvey Rivera
Siuala Ning Maliwalu/Anac Ning Baculud
March 3, 2018
Ing mwa ya ing sangkan da ring pamipate
Ki’lual o magui man king pibale-bale
Maintun at maintun yang panangab nang ike
Bang milablab itang bayang makalele.
Kukumkuman na at manipun yang pali
Kabud datang n’ya mung e mikawat bili
Balang dasan na king metung a piragli
Mangakintal ketang babaya nang api.
Ing mwa ya ing sangkan king kapanamdaman
A manamuyut king metung pilubluban
Agyu nong pipate ring mikaluguran
Mangga ka king mapatad pamiyabe rang nuan.
Anti yang kasalang king bie makipamuk
A susulsul na king mapali a buntuk
Ume yang mamye a mayap kanung usuk
At maglibutad ya king metung a tapuk.
Ing mwa metakmus ya king marok a pusu
Ning metung a Taung kapmung pangalalu
O mekad king diryang mengaskup king salu
A kabud mitanam, maragling tinubu.
Inya, Kaluguran, Kakuyug, Kapatad,
Dalaga’t Baintawu, Anak, mikaidad
Mulingid ko ka’ku king kanakung yatad,
Sunggalitan at mwa ume sa’ng mapatad.