Irvin Harvey Rivera
Siuala Ning Maliwalu/Anac Ning Baculud
October 27, 2018
Tulid ning pisamban, lele ning Iskwela,
Karin kata mikit, karin mikilala
Ing balang pinandit, kanaku maulaga
Minunang sinibul—pamalsinta keka.
Ketang oras ayta mika-samut karug
Masikan a kablas ning pusu at kabug
Ding Batwin at Bulan kaku kong kekuyug
Bang paramdam keka, lugud ku’t panirug.
Makapagmulala istung balikan ku
Masayang aldo ning pamiyakit tamu
Meguing saksi ya ing Kalam na ning Guinu
Ketang mumuna ta’ng pamigalamanu.
Manibat kanita belisa mung lakwas,
Malintwang kung isip, nung nu’ ya miraras
Ding balang penandit, kekatang piyaptas
Yang meguing tula ta karing pamagpaldas.
Tulid ning pisamban miyakit ta karin,
Bombwan ka ta waring miyayo king Jardin?
Aku itang Banwa, ika itang batwin,
Ika ing ka’kung bie, keka’t anti mu rin.
Dintang ing panaun kayagnan ding tala
Sinlag la ring batuin keti king masala
Kabang aslagan da king mitmu rang tula
Ligayang sinubul memisan king ala.
Miririnang sepu sabla’t bague-bague
Kalupa ning tulang kekata’ng dinake
Ding mayumung timan king ka’kung panaske
Bangungut na la mung meguing tagulele.
Tulid ning pisamban, lele ning Iskwela,
Karin kata mikit, karin mikilala
Karin ya mepupus sakdal a ligaya
Kilub ning pisamban, karin ku menaya.