Luid Ya ing Amanung Siswan

Oini ing macalungcut at iti ing catutuan
Tune maliliari kareng Capampangan
Deng carelang anak, ngening salukuyan
King Tagalug do ngan a pakikisabyan.

Nung inia ing tutu at iti malyari
Datang ing panaun ding mesabing sapni
Erana aintindyan at eno maniabi
King amanung sisuan karelang pengari

Oini ing makasora at iti makabuysit
Damdaman mong sabi pengaring masuguid
Taga-tagalug la o kaya maninglis
Pakli no man arung kasabing martinis.

Alana man sanang marok ituru la
Amanung pambansa deng sapning bandi ra
Erasa kakalingwan ituru’t ipala
Amanung siswan tamu iti isaplala.

E sana papaiguit king insanu mang sabi
Amanung liguran amanu tang bandi
Mayap nung mabiasa karing alwang dai
E sana malakwan sisuan tang kandili.

Amanung malagu iti yang mitampuk
King karelang dai nung isanu ing lusuk
Masanting igale king tonung malamyus
Amanung masala amanung tibubus.

Daing Capampangan dapat tang mibule
Daptan ing makaustu at tune dalise
Luguran lingapan ing amanung tagle
Magkang king daratang lumbug ne ping tune.

Sesen at gambulan ing tagle nang leguan
Karing pamigale prosa’t panitikan
Ipuk ya’t ilusuk ketang mayaktangan
Luid ya at lumabung iting Capampangan.