© EMS (Elorde Mendoza Sambat)
Ing Poetang Mipalaut Cordillera
Nanan kumang isipan at iti ing tune
Amanung siswan tamu ta ne mamamate
Pablasang diritak la reng mamaniabi
Tagalug o Ingglis ing karelang sibuburi.
Lumibut lumawe king labuad ning Capampangan
Laluna sa ngening panaung salucuyan
Den mismung pengari a dapat sang mianad
Ila reting maki sabi king Taggalug o Inglis man.
Amanung baniaga ilang sibuburian
Iguingcas ilayun king pamanalastasan
Amanu ning lugud ing amanung siswan
Lalto neng medujagi tune mekalingwan.
Ing makalungkut pa at iti ing malilyari
King teritoryu ning labuad ding mabunyi
Dayang Capampangan tanyag a bayani
Aliwa nang amanu ing mimiral ngeni.
Baket ngamung kutang o nanung milyari
Iting calugurang amanu tang bandi
Baket ditak ditak ume neng mesawi
King insil nang palad king anyung mepawi.
Warit ing amanu matampus ne iti
Akaguisingan da kekatang pengari
Nanupa ing ulaga ning kekatang dai
Nung ing salita mu inandam yang laji?