NINU ITAMU? NU’ TA’ MENIBATAN?

Irvin Harvey Rivera
Siuala Ning Maliwalu/Anac Ning Baculud
March 25, 2018

Ninu itamu at nu ta’ menibatan?
Misapwak ta’ waring alang kamumulan
Balas tamu waring silbag dang makanyan,
At meguing parti ning yatung pagkarinan?

Ninu pin itamu, nu ra ka ta’ tikmus?
Mengari ta’ waring bague alang alkus
Grasya tamung ibat king banwa mibulus
O sibul ta’ng lintong danum a mamagus?

Ninu pin itamu, mengari mong sibut?
Metung tamung bining misabud at linsut
Mayumu ta’ng bunga king pun a melulut
O metung ta’ng liling tanaman a “Dikut”?

O nung makanyan pin nanung ulaga na?
Ning metung a Guinu a milalang keka
Sibul ta’ mung linto a malabug lupa,
Alang kamumulan manibat kanita?

Mibansagan tamung mayap a lelangan
Kawangis nang aske nung yang ilarawan
Ing Tawu king bukud misna nang gelingan
Tibud ne ning Guinu king kayang kaburyan.

Ing sablang upayang pigkalam keng Tawu
Maragul nang sangkan, bang panwalan tamu
Ating metung a Dios a awsan ta’ng Guinu
Mangga king minunang miden ta’ng animu.

SiualaNingMaliwalu #AnacNingBaculud

This entry was posted in Poesia, Poeta Irvin Harvey Rivera. Bookmark the permalink.

Leave a Reply

Your email address will not be published. Required fields are marked *