Perstaym dakang ikit, midayu ku tundû,
e naka mebura, kening kakung salû,
ining panamdaman, pilming e ku balû,
malyaring mepanâ, ining kakung pusû.
Keng kakung animu, mabye ka itsura,
anggiang makapiak la , rening kakung mata,
ika ing akakit , nuku man mibanda,
angga king paninap , pane nang atyu ka.
Kilala daku reng kekang kamaganak,
agad agad naman , agyu rakung tinggap,
masuelu naku man , maybug kupang kumiak,
ing kakung panamdam , lalakad ku ulap.
Aluguran daku, ring kekang partidu,
pati kapatad mu, pati ‘rin bayo mu,
nanu nanung bage , rigalu da kaku,
ing nasa da yaku, ing ayasawa mu.
Inyang milabas ing, makabang panaun,
panatag a lub ku, ika ing maratun,
kabud ka mewala, nung noka linuyun,
karin ku minisip , uling e ka memun.
Nung e ku minapa , keta kekong bale,
e ku sa abalu , nung nunaka mine,
itang kekang sulat , kelinguan dang binye,
karin ku abasa , meko kang malumbe.
Abatyawan kemu, bubung ing bale yu,
balaku ika nang, makasungo kaku,
at ing gawan kuna , paindalan naku,
makikibalita, king kekang estadu.
King misan a aldo, ing e mu piyadian,
bigla kang metuksu, king awus ning laman,
ing abe mu obra , yang apakialaman,
inyang iyuli me , gulmuk kong dinatang.
Atno kamua keka ring kekang pengari,
pero makanyan man, ala nang malyari,
panindigan mune , ing misis mu’t suli,
agyu kupa iti , e pa naman tauli.
Ikwa kung migmalun, king mapilan bulan,
kalinguan kuna ngan , yang kekang depatan,
at ing bayung sinta , dinatang nya naman,
ngeni takda nakeng , kasal king pisamban.
Makabang panaun, ing banuang milabas,
e ku mipanatag , e kupa mimasmas,
masakit idayu, ing binye mung bakas,
kabang bie ku yata, daralan ing kaplas.
Oba’t patse ngeni, asilayan daka,
e ku akalinguan, ‘tang mengalabas ta,
mekiasawa naku , at mika pamilya,
obat keng pusu ku , makaukit kapa!
Sinulat neng
Patria Bondoc David
Tsokolating Lagu – lagu
3 ning Octubri 2015
Capas, Tarlac