Neng: John Bendido
Mipapawas neng matactac, king dalan ning pamaglacbe,
Ing balen cung pacamalan, ditac la reng makisabe,
Nung wari sa keng gareta, metanggal ya ing pagabe,
Pilan lamu reng sinake, ilang bucud mamantabe,
Dapot kening atiglap cu, pilitan cung mamalebe,
Bang ing amanu tang menan e ya lubus mibayube.
Akakit keng tugetugun, mimina na ing talacad,
Nung wari mo sa keng pale, matutukul misasapad,
Indung balen cacung labuad, macanyan yang micucusad,
Uling dening keyang anac, careng daywan no migbabad,
Ing amanung mangatimyas ikwa nang mig ticad ticad,
Nung e tamu gunyat ngeni, lunto tanang licad licad.
Manangis ya’y cacung balen, akmulan ne nitang lungcut,
Itang ginto nang amanu, ditac ditac milulucut,
Keng amanung manarampas, akmulan neng manyayucut,
Nung wari mo keng babagwa, ketang agi mengasaput,
Anting papil a lemutac, mengapirat melamucut,
Mengari mo ketang pale, bayung tanam mengalaput.
Sasagitsin keng pusu cu, anggang atin cung sicanan,
Atsat ke’y cacung gamat, maglantang cung cawatasan,
Keng dase ning pamanyulat, keni kunya paglambisan,
Ing balen cung mal canacu, pagtumaila keng caisipan,
Ing amanung kinang kinang, king salu cu timan timan,
Balen cacu ca magsandal, ica ing cacung candungan.
Mibalangcas ya ing poesia
Marso 26, 2023
Duminggu
Oras: 7:02 PM