Menibat ya pu qñg mumunang ucdu ning librung “Pasyun ding Talapagobra” a misulat anyang banuang 1930.
Neng: Lino G. Dizon
I Cristo tutunggen ta’ ya
Anac ning Dios a talaga
Queti sulip angga banua,
Buri cung ipaquilala
Nung baquit Socialista ya.
Iniang pungul ya qñg atian
Ninung cayang penilasan
Babai yang pun ning calam,
Anac ne ning cacaluluan
Ya i Mariang matimtiman.
Mibait ya iting Mesias
E qñg bale ra ring pantas
Pariseos at Escribas,
Pablasang tutu yang jamac
Lalabangan de penganac.
Pecamal nang diling dase
Ing dicut ampon ing are
Iti yang gueua nang sale,
I Maria ilang Jose
Ila ring sacsing matibe
At iniang dagul neng baguia
Iting anac ning Dios Ibpa
Nu’ ya mequisalamuja?
Caring lupa nang maluca
At cauri qñg ganaca.
I Tata na aluagi ya
Mamabal ne man Indu na
Tune yang talapagobra,
Itang Jesus mequiabe ya
Linagari cang Ibpa na.
E mequialung capilan man
Caring anac ding mayaman
Y Jesus a sidsad calam,
Queya yang papacamalan
Ing uri ning cacaluluan.
Melingap ya at mesese
Qñg pacamal a dalise
Cang Maria ampo cang Jose,
Angga iniang dinagul ne
Iting Jesus a metungue.
Mig mission ya caring tau
Queti mabilug a yatu
Iting anac na ning Guinu,
Pigcamalian deng masolu
Inaus deng mamangulu.
Memili yang alagad na
Purus lang talapagobra
E ya quinanuang macualta,
Lubus nang pepaquilala
Ring maluca mal la caya.
E tinacut menulicsa
Caring mapagsamantala
Qñg cabiayan ding maluca,
Simbung de’ring magpusa-pusa
Qñg gobierno ding masiba.
Meracap ya iting Guinu
Qñg upaya ning gobiernu
Sinentencia neng Pilatu,
E re dininan indultu
Mipacu ya qñg calvariu.
Ico ngening maquiramdam
Caniting casalesayan
Samasan yeng pigunaman,
Ing Dios ning banua’t sicluban
Mete ya qñg cacaluluan.
Manibat qñg pungul ya pa
Mibait at meragul ya
Angga iniang camate na,
Iting Guinu mequilala
Talaga yang Socialista.
<<<<<>>>>>>