-neng ORLY MANALO DIZON
Sucad (silaba): 6/6;
Talatag (linya): Apat (4) balang Estropa;
Orthografiang: C-K; Aug13, 2019.
1
Ala nang aliua a dapat pang gunyat
Nune na itamu at ngeni ing dapat,
Para paglualu ya at layun iangat
Ban Amanung Sisuan e lubus mibatbat.
2
Bilang Paindu da ding balang sibabale
Caring Suli’t Sulul ya iti iyale,
Kilub ning aldol’ldo ban deti misane
King pamilaguma ya ing dapat yapse.
3
King Publicong lugal ya’ng pane sang gagcas
Ban detang daramdam lubus deng amalas,
Indu tang Amanu a yang tune licas
Keti balayan ding Matenacan Uatas.
4
E tana panan ing atin manimuna
King pamipasulung ning Amanung Mana,
Nune agnan ta ngan kimut na at sana
King ban misan pa ing iti mibandera.
5
Inia agcatan la ding’gang Capampangan
Ing ipamingua ya ing Sabi tang Menan,
E ta painburisnan detang sabing daiuan
Ing lugmuc de’t kera Amanung kegisnan.
6
Nucarin me akit ing pamagmasabal
Nune caring gaua at mayubung asal,
Lajing Capampangan agnan ta ngan gusal
Ban Mana tang Sabi e lubus mamacdal.
7
Nu ta man miparas o caya misanglad
PangaCapampangan e ta sa paglingad,
Nune ibanya ing metung tang mapalad
Dayang Capampangan aliua ta tilad.
8
Bilang capanyausan caring ‘gang Memalen
Ning labuad Pampanga ing dapat yang sesen,
Amanu tang Mana ban e mipaburen
Ing pagmasusian ya SALITA NING BALEN.
DIZLAG FARM; Repost Aprill 1, 2023