(Obra Maestra ning San Matias)
Inglamu mo kapilan pa, sumangid dalan daka ikit,
Anti kang batu-balani, ikwa ku kekang milapit
E ku balu nanung sangkan, kakaisip kekang pilit
Anya ing abang pusu ku, mengari yang ebun pipit
Neng misan akakit daka, e ku balu nang gawan ku
Ing sari kung panamdaman nawa ku maybug mabugtu
Potang kaku lumawe ka, kunwari kung duku-duku
Dapot kilub ning pusu ku, misna ku king kakuswelu.
Bista’t man sitwasyun tamu, king isip ku imposibli
Ing luguran daka sinta, para kaku alang mali
Nung sakaling palad ku man ing keka e ku miswerti
Pagpilitan kung tanggapan ing metung ka mung palsimi.
Sagad ing tula ku sinta potang selpon ku titingting
Gagagad kung ibusni ke gyang baterya na magwarning
Busna kapitangan bengi angyang atin makagising
Ban e raku pakialaman, magkunwari kung malasing.
Sana sinta, e kakamwa nung keni ku pepayabut
Ining panamdaman kekang malwat ku nang sasalikut
Uwa tutu man e dapat, sana e muna pagkaymut
Ing panagimpan lugud ning pusung mibalut king lungkut.
Aku ing malsintang Berya a angga ngeni manalig
Nung wari sa’ keng mangadi, keka mangakung matingid
Lugud ku kekang misnang mal e paimburisan tagilid
Anting bangka ban e lumbug den keng katig misumangid.
(neng Madam Sheila Sampang Pineda)
* 06 Abril 2023 *