Juan 20:1-10
binersu neng Orly Manalo Dizon;
Orthograpiang: C-K (ca, ke, ki co, cu);
Sucad: ualu ualu:
Talatag: anam balang estropa;
Estropa: apat
1
Ketang aldo panentra ning / paruminggu dening grupu(alagad)
I Mariang tubu Magdala / e ya iti micontentu
Maranun ya iting minta / ketang cutcutan ning Ginu,
Mengapangasdan ya rugu / king ikit na, obat nanu?
Itang pasbul na’ng cutcutan / macabuclat ya at vaciu
At ita nang Cayang bangke / cabud na mu’ti ala yu
2
Inia ketang cayang(maria) ikit / memirapal ya’ting minta
Caring tucnangan nang Pedro / at metung pang alagad Na(ning Ginu)
Belita na’ting matimid / “kinua re ing Ginu” ngana,
“nung nucarin di binili” / iti rugu ing cutang na
Inia ketang puntung aita / ding adua mengaputla la
Agnan lang minta king patiu / at lalu lang mipacama.
3
Itang metung a alagad(malugud ya i Jesus kea) / minuna ya iting miras
Ketang cutcutan nang Jesus / siniro mu’t e mengangas
Lungub pa’ti ketang kilub / uling ikit na’t amalas,
Metung nia mung malan lienzo / ketang gabun macalapag
At itang bangke nang Jesus / meuala yang e abacas
Nun nanung malalam sangcan / ya ‘ting e na atalastas.
4
Sactung canita no miras / ding adua ketang cutcutan
Ilari Simon at Pedro / ban abalu’ng cabilugan
Ikit da nia’ng telang lienzo / a penacap dang imalan,
King gabun ya macabili / a e lubus dang aintindian
Angga king penandit aita / e talus ing buring sabian
Ning Casulatan I JESUS / SUBLI YANG MIE YANG CATUTUAN.
DIZLAG FARM & RESORT, April 9, 2023