Mala-Soneto
Irvin Harvey Rivera
Siuala Ning Maliwalu/Anac Ning Baculud
April 11, 2018
Tantu iang masaquit tarucan ing pusu
Pane ne’iang salunan at mistulang bigu
Pangaralan me ma’t saria mu neng turu
Mistula ia pa ring mangmang, alang balu.
Nanan mo mang tulid retang ca iang mali
Saria nong baluctut–mallari ia buri
Ania pin maralas mamuli ne’iang saui
Qng capanualan na, carin ia tutuqui.
Asisi me uari ing pusung malugud
Turu me qng bague a e na macatud?
Dapot, ing balu na tantu iang lulugud
Misna ne calalam, maibug neng malumud.
Batu ia mang mabie ing ume mung pucpuc
Maclac ia’t cabalan, masias ia pin buntuc.