Kekayung lalaking, magnasang sumuyû
e kayu malsintang, misna king kalagû
neng misan ing tindag, bulagan na la mû
retang panimanman, ding kekayung pusû
Kukupas ing leguan, e binang maglambat
mamu mang lupa a, sakdal kalinatnat
datang ing panaun, kulurut ya balat
a anting mabanglung, sampagang melanat
Pangilagan yo ring, milalu kabiasnan
a anak nang Ebang, menabluk kang Adan
uling ding aliwang, matas pegaralan
ila pang e biasang, tanggap katuliran
Babaing disenting, mapinu pangimut
neng misan ila pa, ring medyu malikut
ume ka pang mako’t, e pa man migulut
ding karelang buldit, ta nala dudurut
E kayu lalawe, king leguan at piblas
ning ampanganan yung, lugud a matimyas
pakasanakan yo, pamung miyamas-amas
ban e ko sumisi, paniatang ning bukas
E bali nang e la, makaying malagû
ring paninasan yu, ban maging kasuyû
pekamaulaga, malugud lang tutû
at alang kadake, king karelang pusû
E kayu maninap, karing Maria Clara
panaun na la pang, Jose Rizal deta
E yo pagdulapan, pota miras ko pa
karetang disenting, Maria Magdalena
Magkang danasan yu, ing kaku milyari
ketang pilsintan kung, malagung babai
ing binie nang kaplas, king pusu ku niti
panamdaman ku pa, king angga man ngeni
Vhelle V. Garcia
October 2, 2019
Abu Dhabi