Neng Josephine Luz de Leon-Pineda
Ning Balen Baculud
Estropa: 10 ; Linya: 4
Sucad 14 silaba; Rima: a, e, o, u
Atin cung aquilala/ malagu yang dalaga;
malambis ya itsura/ mapundat queyang mata
queng pusu tataglus la / detang balang ayli na
deng balang amanu na/ anti la mong musica.
Potang lapitan mu ne/ anti ya mong sampaga
Sasalingalngal ya banglu/ tutung macayama
potang casabi mu ne/ ing malagung dalaga
siuala lang gagale/ queng pusu durugpa la.
Mecad dacal magdulap/ malsinta quing leguan na;
gugusal king timyas na/ lulugud at malsinta
lalapong upaya ra/ ban mung palabungan da
at apalto ing lugud/ quing malagung dalaga.
Bista man dacal susuyu/ deng mata malungcut la
Nucarin ing quislap ning sala /baquit dimut ya
bista man malagu ya/ aguia mang matimyas ya
lalacuan de’t paglibe/ ring taung asajan na.
Misan cabang pauli / acatalamitan que
mabayat ing saingsing/ sucal lub yang inapse
ing lagu nang saslag/ mitda at milaco cule
pauli da reng taung/ alang masabal quing bie!
Ing malagung dalaga/ malulam queiang asque
aquit mung mangaina ya/ uli ning piglibe de
quing aliuang dalagang/ ibat quing siping bale
bayu ya quing itsura/ bayu caring manalbe.
Antila mong meniglo/detang matang meglolo
licuan de at piglibe/ queng babaing magaslo
maculureti gayac/manayun yamong lulto
oyta’t didiquit-diquit/ cabud na maquigayo.
Dalagang piglibe ra/manangis queyang pusu
Dapot e ra iquit/miguit quing metung guintu
Alang nanumang bage/ ing carela bumuu
Nune itang dalagang/macamal at malagu.
Cacu pang aquilala/ ing malagung dalaga
Malambis ya ping tutu/emu quing itsura
Malagu ing pusu na/ bie yang alang capara
Dapot manasaquit na/pilit pibabatan pa.
Maquirandam ca abe/ queca que paquilala
Pilming quilalanan me/ mecad luguran me pa
Palabunga’t lingapan/ ing malagung dalaga
Amanung Capampangan/ ya pin ing lagyu na!