Neng: John Bendido
Ikit dakang mamayagpag, ketang patak na ning uran,
Kindat kindat kupa keka, ketang makule mung leguan,
Ing banglu mu sisingalngal, mikakalat ketang dalan,
Sasagana keng lupa ku, penyingut ku mitmung timan.
Malamyus ing kekang kimut, ketang angin ka kekenbut,
Uling itang kekang tangke, katamtaman ya keng lambut,
Itang dikut kukulate, keng lele mu pakadurut,
Memaluput ketang sanga, maninasa keka mabut.
Dapot ining kakung pusu, kabud yamu memaglumbe,
Anyang memagbayuk nala, detang bulung ampong tangke,
Ikit kupang patak patak, ing agta mung sasagese,
Anya lalu kang mibusal, keng dikut ning tagulele.
Sampaga ka keng pusu ku, dapot kabud ka melanat,
Migtikum kang alang patna, mengalaput kekang wakat,
Mengari mo keng amanu, liguran meng malinatnat,
Dapot bigla meng kelingwan, ‘yang minta ka lipat dagat.
Anya’y sampagang melanat, amanu yang mengadaldal,
Kareng daiwan memanyatang, lalu yang mengabalbal,
Nung wari mo keng melumud, nung nokarin mengapalpal,
Segipan de reng poyeta, atin lugud at masabal.
Mibalangkas ya ing poesia
April 21, 2023 – Biyernis
Oras: 6:45 PM