megawa ya pu ini kabang magkape ku, atin ku kasing susulat a kuentu (prosa) ning metung a anak a maluka a ginawang diary (diary ning paperback writer), kayi kitnan ne i indu na nung nanu la retang bulung keng pasbul. inisplika na neman ima na pero ngana, mekad deng aliwa makikiapus la mu, e ra naman balu ing gagawan da. ining poesiang ini naman ing magisplika keng gagawan da retang makibalu.
“red carpet”
napun lalawen ke ing siping ming bale,
ketang palmeras na minutut yang tangke,
dininan neng lasu a pekapalakue,
atin ya munaman istampitang kine.
kayi tinagun ya’t mekirandam misa,
layun pabindisiun ing keyang palmera,
ing bindisiun kanu, bage maulaga
bayu ne ibili king peka pasbul na.
layun kung mengutang, ot keng pasbul na pa?
miyaldawanan ya’t langi mung malagua.
ngana kaku, “abe, e mu balu yata,
kasalpantayanan ing kaku gagawa;
anting red carpet yang lidlad keng pasbul ku,
lepag ban paluban king bale mi’yng ginu.”
04/05/20 /13:33
king lele ning mapaling kape