akatulan ke mu pung gewa para keng pamagaral keng amanu tamu. balu ku makasabal yang baggiang babasan pero atin intensiun ing pamiulit-ulit da reng amanu:
pelawe – pecheck up keng doktor
pelawe – pepabante
pelawe – pepakua
pelawe – pesali
lawen – manaya keng resulta (e ya pu utus a “manaya” ini, nune “bala” ya o “warning”)
“lalon mu” o mangabaldugan “balu mu ing lawe” – ini ing sasabian da reng makatua neng babawal de ing anak, uling kanita lawen de mu ing anak, at patugut ne keng gagawan na, o kaya naman nung yutus re, agad ne dapat mamintu. ini ing dake ning kulturang Kapampangan a matalik nang makalinguan uling dakal nong anak reng e makibalu keng lawe.
===========================
“lalon ku man kanu”
pelawe neng ‘ma ku nandin i wali ku,
iniang kauli ra pelawe ne kaku,
kaibat, pelawe ne ing palis kanaku
kaibat pelawe yang asan ketang kantu.
ane dakal utus, purus pamo lawe,
itang palis timbu, kaku pelawe ne
i wali kaibat neng keng doktor pelawe
iniang kauli ra kaku ne pelawe.
uling pelawe ne megisan ya pera,
lawe-lawe ne mung malulam a mata.
uling mimisding ku keng kaku utus na
metaram ya lawe at kaku mibua ya:
balu mu ing lawe ngana kakung mimua,
lalon mu dugpa ya keka ing paluka.
tita bern
03/01/21 /12:26
kabang makapainawa keng obra