Abasa ku king talamitan nang tang PL Felix Garcia ketang metung a thread a malagad la pala reng susulat tsa-14 silaba a maki sesurang 7/7 karing makudtang Kapampangan. A pisabi mi no man Ka Tuazon Sabandal deng sakdal a rima nandin bagya. Bigla kung mika-inspirasyun ania kabud ku niami asulat ini..
Ding Lara Nang Indu Ku
Mala- Soneto
Silaba 14 Sesura 7/7
Estropa 3 Quatrain 1 Couplet
Sakdal A Rima
Satire
Disan ke ing indu ku, e patugut kakatak
uling e ku a-obran, ing dikut nang pataktak.
Ing buri na bayu sa, ing uran kanu patak,
malinis ne ing mula, pelalu itang pitak.
Ania ing depatan ku, ban kesang apatiman,
dinwang kong agad kaya, deng sagana kung suman.
Aniang talipan na la, no kaimpis a laman,
ania ing kakung indu, miglitania ne naman.
E naku mu binulad, at agad kung memiblas,
pegobran ku niamu ing, mula ming misna lualas
pemutut ku ing dikut, at timbakan kung balas,
dapot king depatan ku, lakuas kung merimalas.
Pelalung ding lara na, a kayang pakabanten,
kaku lang atambunan, maybug na nakung paten.
Rodel E. Gozum
05 Mayo 2023
San Simon