Makuyad A Poesya
Irvin Harvey E. Rivera
Siuala Ning Maliwalu/Anac Ning Baculud
August 15, 2019
Kapayit na irug yang bungang Apalya
A kanakung pipul—lugud yang piraya
Yang mamu kung pusung yayampang kung sarya,
O’bat tikusan mu–likwan mung daraya?
Nanan ku pang dalit nung kelingwan mu ne
Malagung musikang agnan ta’ng gagale,
Na’n ku pang sumulat kawatasang babye—
Mayumung panirug king sisintang tune?
Neng managulele at manigapu ku
Ala kung agingkas nanu mang Amanu
Magparalumpu kung mamawus king Guinu,
O’bat makanyan pa ing meguing ablas mu?
Na’n ku pang gulisak king tula paylumud
Nung pisumpanan ta’ kayagnan nang menyud?
Nanan ku pang kawe king dayat ning lugud,
Nung king bandang sepu aku mung malumud.
Inya ngeni, aku pabustan da na ka
Kalingwan ku na ing megui mung ulaga
Ding sablang milabas a aldong palyasa
Kayagnan kung ‘kutkut, kayabe ning dusa.
At bayu ku mamun ikutkut ku na ngan
King baul ning isip at pamangalingwan
Pututan ku na yang kapasimbalangan—-
Talikalang lilu na ning kapalsintan.