Irvin Harvey E. Rivera
Siuala Ning Maliwalu/Anac Ning Baculud
May 3, 2019
‘Nu’ ya angga keka ing pamibabata?
Yan ing maralas kung pane kutang kaya
Gintu ya ing oras king pamanenaya,
Nung ilarawan ke obat mibata ka?
King dane ning sepu nanung kapanayan,
Nung ing pangasawi ya nang pagpaldasan?
Nung balang sagakgak mie sa’ng karatunan
Ing pamikakunu mamun kung kalingwan.
Nung ding sablang batwin e no miyandap pa
E kaya dalumdum ing Karinang Banwa?
O mekad ing angin tuknang yang magkanta
E kaya misimpan ing tagle nang dimla?
Nung ing Aring aldo e ne subling sumlag
Kayaryan ning yatu, e kaya mipasyag?
Nung ding dayat malat king dagus da’t asag
Palbug de ing yatu, pupusan de’t itwag?
Nung ing pinanari magkulang ya kulul,
E kaya mibayu ing tagle nang simbul?
Nung ing kildap kaya ampo ining duldul
Yang mikutkut ka’ku king sidya rang kulkul?
E ku kaya mate nung ilarawan ke,
Ing paintungulan ning sinta kung dalise?
Misimpan ka ka’ku yang ka’kung kamate
Ing e mu tengwanan yang kapupus ku bie.