Sibuknan ku na naman sumulat timawang bersu kanita. E ko makaying buri uling para kanaku, mayan lang bagyang isulat uling ala kang tutukian a sukad ampong rima. Ampong kanaku, ing datang da, balamu prosa lamu.
Ing Dalan Na Ning Kabiasnan
Lorung Malabit
Timawang Bersu
*
Ing ayunan na ning kaisipan
metung yamung binutil a balas
king aplaya da ring bagebageng
gagalugaran da ring e abilang
a manintun king nung nanu
ing sukat tanguanan o salungatan.
**
Ing ayayabut na ning panintindi
aliwa ya ing sikoti na
ning nung nanung sukat abutan.
Ing kaisipan e ya sukat isara
king buri rang ituglung ding malaut na disnan.
Ing pamananggap king katutuan
a e na ngan agyung ataruk ning isip
king kapamilata’na ning sarili nang kagiwan
ing sablang atagmua’na
karing lalam da ring mibaligtad a batu
iya pin ing dalan papunta king kabiasnan.
Rodel E. Gozum
19 Pebrero 2015
Munoz, Quezon City