belangcas neng Orly Manalo Dizon
Sucad: 6/6 silaba;
Talatad: 4 linya;
Estropa: 14 (labing apat);
Orthograpiang: C-K (ca, ke, ki, co, cu) ;
Jul 31, 2013; 16:15 hours
1
Kilub ning aldoldo a mangapaliari
King pibale-bale ‘ya ing magmantini,
Manibatan abac angga na’tang bengi
E biasang papagal ketang pamagsilbi.
2
Bayu ya pa sunlag itang aring aldo
Agiang puyat ya pa piragli neng ticdo,
Maglutung amusal, samasan ding plato
Ban ketang dulang la caring salusalo.
3
Istung casinup da detang pipanganan
Pamaglinis bale ya naman umpisan,
Caibat tipunan na marinat dang malan
Sabunan icula bayu ‘ti luglugan.
4
Caibat nang asable itang pinipi na
Tsaca ya mamalis king carelang mula,
Mandicut, manugtug mialiuang tanam da
Ampong sungkitan ding malulut nang bunga.
5
Detang ayagtal na dala no’t pisalî
Ketang lapag-lapag ban maging salapî,
Caibat lauen na la at cuentan piraglî
Ban paltang cailangan yang keang itukî.
6
Caring ayabli na sali yang ayasan
Pilan kilung asan at paltang cailangan,
Ketang salicap na layun nong puntucan
At tsaca ne ume bale nang tucnangan.
7
Ing carelang pagtuan manaya king bale
Ya naman ilutu king timpla iyapse,
Ita nang lugud na, caring catubale
King keang pamilyang pibandian nang tune.
8
Potang datang na la detang cayang anac
Ibat king escuela pauas da papatac,
At ing asaua nang sinarul king dayat
Itang nasi’t asan tana yang iyapag
9
Caibat na ning pagtuan ya na naman dili
Itang cayang gulut iyatyat ne iti,
At pangagising na tane man manulsi
Keta nang malan dang metastas na’t gisi.
10
Itang aring aldo bayu ya mipanpan
Manaliuang aske carin king albugan,
Tutuking lutu na ita nang apunan
Lutung kitmuan lugud macaganang mangan.
11
Bayu la matudtud, mitipun- tipun la
Arap na ning altar pasalamat Caya,
Ketang Ginu tang Dios Ibpa carin banua
Grasya Nang pigcalub at pangacabus da.
12
Cayaring mengadi ya naman arapan
Ing “black & white tv” iya ing pagtiagan,
Detang teleserye a susubaybayan
Caya iti munie ditac capasnauan.
13
Potang magkera ne diua na lilibad
Caya nang isipan ing tutuking abac,
Dala nang matudtud abe king paninap
Nung nanung manaya king aldo ning bucas.
14
Macanian dudurut ing patingapun na
Bie nang daralanan SULU NING PAMILYA,
Lugud na at lingap pane nang padama
Pusu nang busilac alang acapara.
May 9, 2023; DIZLAG FARM & RESORT