Neng Al Pedroche
(Alas onsi ning abac)
Yng campanang guintu
qng lumang pisamban,
malambat neng sira
at è gagamitan.
Pablasang balbal ne,
ingè mu’yng babie na,
Carin qng simborio
niamu migpainaua.
Ating aduang pusung
tutung micalugud,
carin qng pisamban,
bisa lang pabuclud.
One’ng reng matua ra,
masias lang tututol,
at nung càsal la man
atin lang cundisiun.
Ngara:
“Babie cu quecayu,
metung a cundision,
bayu mi ibignus,
quecaming bendisiun.
“Potang ganinaldo,
dapat tumigtig ya
yng campanang guintung
balbal at sira na!”
È la quesiran lub
retang micalugud,
cabang mengadi la’ng
macatuclip yng tud.
Din’tang ya yng abac,
miguising ya’yng baryu
Qng musicang ibat
qng lumang simboriu.
O’yta tinigtig ne, yng
campanang guintu,
bunga ning pangadi da reng aduang puso,
Pusu’ng micalugud, alang capupùsan, pamalsintang wagas, anggang camatayan.
Nun tune yng lugud, anggiang bunduc ya man, agyu neng lasacan, agyu neng patagan.
Nun manalig tamu qng quecatang Ibpa, yan mang imposibli agyu ta’ng agaua.