Mayu 14, 2023
‘ma,
Ini ing mumuna kung diling sulat keka. E ku balu obat e ka bisang manigaral gumamit selpon, aggiang sanang teks mu. E ka kasi mailig keng teknoloya, e. E di sana teteks danaka mo. Bastat kasi makapanalbe ka mung tibi, okey na keka. Ing tauli mu yatang ginamit a bayung teknoloya iya itang brikgeim, kayi ala na. Isipan mu kasi e na makabage keng idad mu, isipan mu kasi matua naka ban gumamit pang bayung teknoloya.
Ini ing mumuna kung diling sulat keka, panupaya mu uling nung nanu ka kalagu sulat-gamat, iya namang katsura na ning kaku. Ala kung pemulian keka karas keng pamaniulat.
Mangutang ku mu, nanu, makanian tamu taganang Kapampangan? E tamu tagana sane sasabian kareng kaluguran tamu ing kaluguran ta la?
Itang bala mu kanunongan tamo? E mo kalupa keng Inglis, i love you, ngara, asna mu kayan sabian da ita pero potang itamu nang magsalita, at nung sabian ta ya keng Kapampangan, asne kanong pakirandaman; bala mu pigawa yamu. O pota taganang e tamu mu sane magsalitang makanian? Aggiang paniningaya tamu kareng aliwang tau ing lugud tamu pero e tamu asabing daretsu kareng mal tamo?
Makanian tamo? Kayi potang memangkad ne kanita tamu galagaleung at sasabian a kaluguran ta la uling e ra na darandaman? Kultura tamung tagana ine? O keng amanung Kapampangan tamu mu e asasabi?
king bage aku kasi, mas buri kung damdaman mung kaluguran daka kesa keng dandaman mu mung kaluguran daka. King bage, ibat keng malati ku e ku dindam keka a sinabi mung kaluguran mu ku; ibat keng aggiu kung tandanan, e ka minapse makanian a amanu kanaku, pero daramdaman ku keka a kaluguran mu ku -kareng balang sakripisiu mu, keng pagal mu, kareng dakal a pamitagun a yuna mu kaming mikakapatad bayu ing batal mu. Aggiang e mu kami man arinan a masanting a bie kalupa ra reng aliwa pero e ku amenus ing sakripisyu mu.
Atatandanan ku pa, kanita kukutnan daka reng aliwang tau obat e naka mekiasawa aggiang anak ka pamu iniang mamun ya i tatang keti sulip, pero ing pakibat mu, maganaka ya kasi i tatang at e ya bitasang meyan a gamat keka, at pota nung makiasawa kang pasibayu, makatupa kang kabaligtaran na panugali, at pota angga ikami dugpan nang gamat. Inia e baling magkakasakit kang makikipagobra, mapagal kang makikipamipi, pibata mu ing sabla ban kanita makasiguradu ka mung masalese kami bili aggiang e manawang kalupa ra reng aliwa. E ku bitasang ikit a inuna meng seling imalan ing sarili mu -misan man, ali. Ing pane mung susulud itang pamie ra neng magpasku, itang pamie ra reng grosari ampong hadweir, inia istung magpasku na alub mu namu atin mutus kekang saling kesio, saling ketal ban kanita mika-imalan ka.
E mu bitasang sinabing kaluguran muku, ali, pero makaslag keng kimut mu ing lugud, bista man neng misan kandut ing dagpa o barug, pero aggiang nanan kung pakibitasan ngeni, ing sablang bage ita, lugud ngan at alang nanu mang matsurang layun. Dakal a besis ing kakamuanan muku. Atatandanan ku pa pin, kitnan daka kanita obat deng aliwang anak maliari lang managkas, obat aku alu ku. Obat deng aliwang anak maliari lang magmamayabang pero aku ali ku. Obat maliari dang gawan ing buri ra reng aliwang anak pero aku ali ku. Obat panusignan da la reng aliwang anak pero aku ali mu ku.
Iniang mebaintau ku, e mu ku tenguanan aggiang metung sigariu o aggiang metung mung basung alak, agad me mung ikuentu i tatang ketang mabie ya pa. Kayi agad mu mung sabian a ing bisiu nang tatang iya ing sasamasnan ne at paglarinang pane ing bale, ampo pang bisiu namu ing sisimba neng Duminggu. King bage saksi ya itang ternu kung imalan keng bisiu nang ita uling e ya sasalang mitutuki kanaku neng aldo Duminggu.
E mu bitasang sinabing kaluguran mu ku pero maralas, istung atin lang ibie keka reng aliwang tau, mas buri pang iyuli mu namu kekami ban keng atin saganan.
Balu mo, aganaka ke itang maninterbiu karetang lulub obra, ngana, “mumunang diling kailangan keng obrang ini iya ing pamaging mabilis kimut. Pane ka dapat makasadia aggiang nanung oras a kailangan naka nining obra; istung inaus daka, dapat atiu ka. Dapat mapibabata ka. Alang aldo painawa aggiang aldo Duminggu, at lakuas pang miraragdag ing obra istung atin pusiunan o kaya okasiun, at dapat daraptan mung matula at makatiman ing obra mu. Kailangan atin kang balu keng pinansial, keng pamaglutu, ampo pa keng medisina. Ing kaba na ning oras ning obta mu 24 oras, 7 aldo paruminggu, 365 aldo ning pabanua. At nung sueldu ing pisasabian, alang sueldu,” ngana ning maninterbiu.
Mekibat ya ing metung a interbiuan na, “e ke luban ing obrang yan,” ngana.
“Ligal ya ing obrang yan?” nganang mekibat ning metung a interbiuan.
“Wa, ligal ya,” ngana ning maninterbiu.
“makatau ya ing obrang yan?” ngana naman ning metung.
“Atin naman sigurung painawa aggiang baggia mu, ne?” ngana ning metung.
Mekibat ya ing maninterbiu, “ala,” ngana.
“Kamuritan ing obrang yan,” ngana ning metung.
Mekibat ya ing maninterbiu, “balu yung bilyonis la reng lulub keng obrang ine?” ngana.
“Ninu?” ngara reng interbiuan.
“Ding indu,” ngana.
Kayi bigla rakang aganaka, aisip ku, kailangan mu pa waring sabian a kaluguran mu ku kaibat kung abalu ing kailangan keng opisiung liban mu?
Ing pasalamat keng Dios a meging inda naka,
Ing masanting mung anak
