Mala-soneto
Silaba 12 Sesura 6/6
Quatraib 3 Couplet 1
Taladtad 14
Ma-inip naku king kapapanenaya
deng beyang sigaryu pakatumpuk nala
mandilu naku king pawas a marimla
malare’t managi no ring kakung mata.
Pabalikbalik kung mengari king duyan,
mikagasgas ne ing kakung lalakaran
pelalung sarili kakung pakisabian
ding santu king banua inaus ku no ngan.
Apupud ku no ring kuku kung talirî,
mekatalibu ne megulu ing sangî,
apanginis ku na pelalung ing labî
lakuas pang merakal ing buak kung maputî,
Anggang e ku damdam masikan a uhâ
e mako ing karug king salu kung maynâ.
Rodel E. Gozum
19 Mayo 2023
San Simon