nang: PL Sergio Gramonte Calayag
Ikuentu ke’ng kaluguran a dati kung disipulu
Iniang iya ing magaral masipag yang akakit ku
Tune atin yang paninap ban kening bie ya masensu
E patugut manigaral, akakit na kareng tau
Megobra ya keng call center iyang meging supervisor
Dapot ini iyang likuan, e kuntento kareng pabor
Menitun ya liwang obra at miras ya keng konstraksyon
Isipan na ing pulayi, pakinabang a solusyon
Keng isip na deng magobra, tutung e la pin mikualta
Ing magtinda at pa-obra ila rening mikapera
Inia iyang pegaralan, manakitan ya keng pera
Liban na ing mamisali (sales) pegaralan ing agus na.
Sinubuk ya at mebigu, iniang iyang megumpisa
Nung nukarin ya migmali, iya ining inulit na
Pasibayu yang sinubuk, ing tagumpe malawut ya
Inia iya ing mig-abroad manakitan ing nasa na
Kauli na Pilipinas biniayan neng pasibayu
Itang kayang apusuan buring-buri nang negosyu
Memuhunan at megaral, memakiabe ‘liwang tau
Balang turu tatandanan, atsu isip at keng pusu
Keng tiaga na’t pamagsikap, iya ining menagumpe
Sinaupan no reng pamilya at aliwang akayabe
Inia ikit keng gawa na, e sinuku keni nang bie
Erapan no reng pagsubuk, ayabut na ing tagumpe