Irvin Harvey E. Rivera
Siuala Ning Maliwalu/Anac Ning Baculud
September 30, 2020
Guinu, ati ku pu king kekong arapan,
Maka-kurus gamat, makaruku kanwan
Lalapit ku pu at panyawad ku naman,
Tawad ing sabla kung marok a depatan.
Kabang sisiklawud, manigapu ku pu,
Sisisi oh Guinu at magparalumpu
Sasamban daka D’yos—Ari na ning Yatu,
Sasalpantaya ku, oh Guinu! Pakalulu!
Ulwan yo pu sana, dinan kapaldanan—-
Ding salunan king bie, ding kababatyan,
Ding malintwang isip, ding misasakitan.
Ding managulele king bie daralanan.
Pakayapan ye pu Balayan ming sakdal,
King ba yang timawa king sadya nang dangal
Apisan yo pu sa’ ding sablang miyalal—-
King ba lang mipakde’t mirinan masabal.
Sitsitan yo pu sa’ng lingunan da kami
At e ra ke sana bibili king tawli
Uling e mi agyu ing magdilidili,
Ing karelang saup yang adwan mi ngeni.
Karing sigalut at makamateng sakit
Iwas yu ke pu sa’t e pabreng manaplit
King kekeng katawan e sana manampit
Bendisyunan yu ke sa’ pu anggang binit.
Tabalu nung bakit e la maniwala
A ikayu ing D’yos keta pang samula
At nung bakit kaya e la pin talanga,
King ba ra ngan akit ing sablang himala.
Ika yu Guinu ku, ing salamin ning bie,
Ika ing inawa karing ‘gang mabibie
Keti babo sulip, nu’ man pamaglakbe
Tayran yu ke gamat at piyabe-abe.