Irvin Harvey Rivera
Siuala Ning Maliwalu/Anac Ning Baculud
March 23, 2018
Malapit na naman aldo ning alalan
Aldong pamamili caring manungculan
Calupa ning sadya at mengalabasan
Dacal la ring bisang mipuc qng luclucan.
Balu mu ping balu istung paratang na
Aldo ning alalan macule tagana
Dacal nong lumapit at cumaul queca,
Maquigalamanu, maquipagquilala.
Apagumasdan cu caretang tatagal
Atno pangalicut ding carelang batal
Ume queni’t queta ampong quesio que’tal
Patie limput nala e mu no atagal.
Pane rang pasuala imbut dang masampat
Malinis la canu ding adua rang gamat
Metung a pangacu, magsilbi lang tapat
Serbiciu qng Balen pane rang lalatlat.
Anta pilang ucdung dimdam cu na ini
Pilan nong tinagal nanu mo’ing millari?
Pilan pang pangacung anti mo careni
Ring lumual qng asbuc at ibandu ra reti?
Inia Cabalen cu mulinig co cacu
Lalaqui’t babai qng Ciudad o Bariu
Metung a caiausan quetang pamagbotu
Mamili ta caring tapat magserbisiu.
E ta’ na pu sana paimburisan man,
Ing maroc dang nasang mipuc qng balean
Ngara ding macatua nung mamili ca man,
Pacapili mu na’t pacacalisquisan.